Հուլիսի 8-ին ոստիկանական բիրտ ուժին հանդիպած բազմաթիվ մարդիկ, որոնք եկել էին «Հարսնաքարի» մոտ ի հիշատակ հունիսի 29-ին ռեստորանի ավոտակայանատեղիում դաժան ծեծից մահացած Վահե Ավետյանի՝ մոմավառության, շարունակեցին իրենց պահանջները՝ ռեստորանի սեփականատիրոջ՝ ՀՀԿ անդամ, ՀՖՖ նախագահ Ռուբեն Հայրապետյանի տան դիմաց:
Հասարակական ցասման ու արդարության պահանջի համար պայքարող քաղաքացիների պահանջները հստակ էին: Ըստ հատուկ կազմավորված քաղաքացիական նախաձեռնության անդամների՝ առաջին հերթին Ռուբեն Հայրապետյանը եւ դժբախտությանն մասնակից յուրաքանչյուր ոք պետք է փոխհատուցեն Վահե Ավետյանի ընտանիքին հասցված նյութական եւ բարոյական վնասը:
Երկրորդ՝ Հայրապետյանը պետք է զրկվի քաղաքական ու հասարակական գործունեություն ծավալելու հնարավորությունից:
Երրորդ՝ Ռուբեն Հայրապետյանը օրենքի ուժով պետք է կրի իր արաքներին համարժեք պատիժ, քանի որ ըստ նախաձեռնության անդամների «նա պատասխանատու է քրեածին վարքագիծ ունեցող անձանց իր թիկնազորում աշխատանքի ընդունելու եւ իր հանրայի ելույթներով ու կենսակերպով քրեածին աշխատելաոճ ձեւավորելու համար»:
Եվ վերջին պահանջը՝ հանրությունը պետք է հրաժարվի Հայրապետյանի ընտանիքին պատկանող ընկերությունների արտադրած ապրանքներից ու մատուցած ծառայություններից:
Երթի մասնակից «Սարդարապատ» շարժման անդամ, ռեժիսոր Տիգրան Խզմալյանը նշում է որ այս ընդվզումը ոչ այնքան Ռուբեն Հայրապետյանին է ուղղված, որքան. «Այն համակարգին, որի խրտվիլակն է դարձել Ռուբեն Հայրապետյանը»:
«Մենք տեսնում ենք, որ մարդը ապրելու իրավունքից է զրկված, ոչ թե արժանավայել ապրելու, այլ ուղղակի ապրելու: Ազատությունը դա ծանր բեռ է, ազատությունը ոչ այնքան իրավունք է, որքան պարտականություն, դու պարտավոր ես լինել ազատ: Այստեղ հավաքված մարդիկ դեսպաններն են, որոնք ներկայացնում են իրենց ընտանիքը եւ մեր շրջապատը: Գալով այստեղ եւ կանգնելով ոստիկանների դեմ դեմից, որոնք պաշտպանված են եկել, մենք մերկ ձեռքերով ու անձրեւից թրջված միեւնույն է այստեղ ենք»,- ասում է Խզմալյանը «Մեդիալաբին»:
Մարդու իրավունքերի պաշտպան եւ «Ժառանգություն» նախկին պատգամավոր Լարիսա Ալավերդյանը «Մեդիալաբին» ասում է, որ իշխանությունը պատասխանատվություն է կրում 2004 ապրիլի 12-ի, 2008-ի մարտի 1-ի զոհերի եւ Վահե Ավետյանի մահվան համար:
«Իշխանության վրա է լինելու պատասխանատվությունը եւ որեէ բախումնային սցենարի դեպքում»,- հավելում է Ալավերդյանը:
ԱԺ պատգամավոր, «Ժառանգության» խմբակցության նախագահ Րաֆֆի Հովհաննիսյանը նույնպես խոսում է իշխանության պատասխանատվության մասին:
«Ամեն օր սահմանի վրա իրենց կյանքը տվող զինվորների համար եւ այս դիտավորյալ մարդասպանության համար սեփական երկրում, իշխանությունը իր վրա պետք է վերցնի բարոյական եւ իրավական պատասխանատվություն, ընդունի իր մեղսակցությունը, իր մեղք եւ հրաժարական տա: Այստեղ Հայաստանի քաղաքացու, հայ մարդու ազատության իրավունքը, արժանապատվության, սահմանադրական դիրքը, որ պարտավոր է ապահովել Հայաստանի իշխանավորը՝ գործող նախագահից սկսած մինչեւ շարքային ծառայող, բոլորը կկրեն իրենց պատասխանատվությունը»,- ասում է Րաֆֆի Հովհաննիսյանը:
Երթով Հայրապետյանի տնից կրկին հանցնանքի վայր՝ «Հարսնաքար» վերադառնալով, մասնակիցները հայտարարեցին, որ բողոքի ու արդարադատության պահանջի ակցիաները շարոնակական բնույթ կկրեն, որոնց մասին նախապես կծանուցվի:
© Medialab.am
Տեսանյութը՝ «Մեդիալաբի»
