«Այդ մարդիկ 30 տարի տզրուկի պես ապրել են մեր վզին, հիմա այդ տզրուկներին գցել ենք մեր վրայից, բա կնյարդայնանան, բա ի՞նչ կանեն». Լալա Մնացականյան

«Այդ մարդիկ 30 տարի տզրուկի պես ապրել են մեր վզին, հիմա այդ տզրուկներին գցել ենք մեր վրայից, բա կնյարդայնանան, բա ի՞նչ կանեն». Լալա Մնացականյան
«Այդ մարդիկ 30 տարի տզրուկի պես ապրել են մեր վզին, հիմա այդ տզրուկներին գցել ենք մեր վրայից, բա կնյարդայնանան, բա ի՞նչ կանեն». Լալա Մնացականյան
Հեղինակ MediaLab

«Մեդիալաբի» հարցերին պատասխանել է դերասանուհի Լալա Մնացականյանը:

– Տիկի՛ն Մնացականյան, մեկ տարի է անցել Հայաստանում տեղի ունեցած թավշյա հեղափոխությունից: Շատ է շահարկվում հարցը, որ ոչինչ չի փոխվել մարդկանց կյանքում: Դուք ի՞նչ եք նկատում, ի՞նչ է փոխվել:

– Ես համամիտ չեմ այդ գնահատականներին, որովհետև ամեն դեպքում գոնե ներքին համոզվածություն ունեմ, որ թալան, գռփել, անպատժելիություն չկան երկրում: Այսինքն՝ կա, բայց քիչ: Բնական է՝ դա չի կարող միանգամից վերանալ:

Բնական է, որ կան խնդիրներ, որոնք ինձ էլ դուր չեն գալիս, բայց դրանք ճակատագրական հարցեր չեն: Եվ ես կարծում եմ, որ ամեն դեպքում երկրում օրենքը գերակա է դառնալու: Եթե վաղը-մյուս օրը մեկը հասարակ քաղաքացուն վիրավորի, նա կարող է իր իրավունքները պաշտպանել: Նախկինում մարդն իրեն շատ անպաշտպան էր զգում, հիմա, կարծում եմ՝ ո՛չ:

– Որոշ շրջանակների կողմից նաև այն հարցն է բարձրացվում, թե վարչապետ Նիկոլ Փաշինյանը չունի նախկին վարկանիշը: Դուք նման միտումներ նկատո՞ւմ եք:

– Ոչ թե նրա վարկանիշն է նվազել, այլ ես կարծում եմ՝ չկան այն ոգևորվածությունն ու խանդավառությունը, որը կար նախորդ տարի: Դա բնական է, կյանքի նորմալ հուն ենք մտել: Ես չգիտեմ, թե ինչ առաջընթաց կլինի հետագայում, բայց մի բան փաստ է՝ մենք այլևս հետ նայելու իրավունք չունենք: Իսկ այդ բոլոր շահարկումները մեզ դարձյալ ցանկանում են վերադարձնել հնին, անընդհատ օրինակ են բերում հինը:

Բայց հնի ի՞նչն էր լավ, ոչ մի լավ բան ես 30 տարվա մեջ չեմ տեսել: Նույնիսկ երբ ասում են՝ ճանապարհներ են կառուցվել, ես ասում եմ՝ կառուցվել են մարդկանց արտագաղթի հաշվին: Մարդիկ երկրից արտաքսվել են, ստորացվել են, աղքատացել: Դրա հաշվին պետք չէր այդ ճանապարհները կառուցել: Ես միշտ հարց եմ բարձրացնում՝ ինչո՞ւ պետք է Հայաստանի սահմանին ռուս սահմանապահը կանգնի,  ինչո՞ւ, դա իմ երկիրն է:

Եվ շատ ոլորտներ տվել են ռուսին, հիմա ասում են՝ վատ է: Եվ դա ասում են այն մարդիկ, ովքեր տվել են: 30 տարի շարունակ տզրուկի պես ապրել են մեր վզին: Հիմա այդ տզրուկներին գցել ենք մեր վրայից, բա կնյարդայնանան, բա ի՞նչ կանեն:

– Վարչապետ Նիկոլ Փաշինյանն ազգային անվտանգության ծառայությանը հանձնարարեց պայքարել մանիպուլյացիաների, ֆեյք նյուզի դեմ: Ի՞նչ եք կարծում՝ կոշտ մեթոդներ պե՞տք է այս հարցում գործի դրվեն, թե՞ այլ տարբերակով կարելի էր պայքարել:

– Ես չեմ կարող ասել, թե ով պետք է զբաղվի այդ գործով, բայց ես մեկ-երկու անձնական վիրավորանք եմ լսել հենց վարչապետի հասցեին և կարծում եմ՝ միայն այդ վիրավորանքի համար այդ մարդկանց կարելի էր պատասխանատվության կանչել: Մանավանդ երբ վիրավորանքը եթերից է հնչում: Դու կարող ես չհամաձայնել նրա վարած քաղաքականությանը, բայց անձնապես վիրավորելու իրավունք չունես: Հիշեք, թե նախկինում ինչ կլիներ նման անձանց հետ, եթե որոշեին սահմաններն անցնել: Այո՛, այդ ամենը մանիպուլյացիա է, հնի վերադարձ: Գիտե՞ք ինչ, իսկապես ամեն ինչն է քանդված, ի՞նչ մեկ տարի, երկար ժամանակ է պետք վերականգնելու համար: Անձամբ ես շատ հարցերում ավելի կտրուկ ու կոշտ կլինեի:

– Այսինքն՝ կարծում եք մեղմ քաղաքականությո՞ւն է վարվում նման ուժերի դեմ:

– Այո՛, շատ հարցերում մեղմ են: Ես համոզված եմ, որ վարչապետն ու իր թիմակիցներն ամեն դեպքում զբաղված չեն ալան-թալանով, չեն գռփում, աղքատի ու որբի բերանից հաց չեն խլում, ոնց որ նրանք արեցին:

– Այդուհանդերձ, նոր իշխանությունում էլ կարծես կոռուպցիան տեղ ունի: Վերջին շրջանում բարձրաստիճան պաշտոնյաների վերաբերալ գործեր են հարուցվել: Սա նորմա՞լ գործընթաց է:

– Ես ուղղակի չեմ հասկանում, թե ի՛նչ է կատարվում Դավիթ Սանասարյանի շուրջը: Ամեն դեպքում, ինքն ինձ վրա լավ երիտասարդի տպավորություն է թողնում: Իհարկե կլինեն կոռուպցիոն դրսևորումներ, բա այդ մարդիկ հո գետնի տակը չեն անցնել, նրանցից ոմանք շարունակում են մնալ պետական համակարգում: Մենք ուզում ենք քնել, առավոտյան արթնանալ ու տեսնել, որ կոռուպցիա չկա, այդպես չի լինում:

Տասից  վեցը-յոթը կաշառակեր էին: Բա նրանք ո՞ւր գնացին: Եվ ես գտնում եմ, որ կոռուպցիոն հանցագործություններ կատարած անձինք շատ խիստ պետք է պատժվեն, որովհետև չարիքը հենց այդտեղից է սկսվում: Այդ կոռուպցիայի արմատները գալիս են դեռ ճորտատիրական Ռուսաստանից, որի «գուբերնիան» էինք մենք, հետո եկավ Սովետի «երջանիկ» ժամանակահատվածը, և կաշառակերությունը վերելք ապրեց: Ասում են՝ Սովետում կաշառակերություն չկար: Ո՞նց չկար, կաշառակերությունը number one-ն էր: Այն, ինչ մենք Ռուսաստանից ժառանգեցինք ու որդեգրեցինք՝ որպես մեր արժեհամակարգ, ինչքան հնարավոր է դրանից շուտ և արագ պետք է ձերբազատվենք:

– Եթե ամփոփենք, հեղափոխությունից մեկ տարի անց ի՞նչ ունենք և ո՞ւր ենք գնում այսօր:

– Մենք ճանապարհ ենք ընկել, գնում ենք: Այո՛, մենք որոշել ենք իսկապես ունենալ մի երկիր, որը կունենա Դեմք: Մեր երկիրը դեմք չի ունեցել: Մենք և՛ կենցաղով, և՛ մշակույթով նմանակում էինք սրան-նրան: Հիմա որոշել ենք ունենալ դեմք: Մենք ընթացքի մեջ ենք, ես հավատում եմ, որ այդ ճանապարհը մեզ կտանի դեպի մեր դիմագիծը, մեր ազգային ու ուրույն դիմագիծը: Շատ դժվար է դիմակայել, բայց կկարողանանք:

Ռոզա Հովհաննիսյան

MediaLab.am