«Մեդիալաբի» հարցերին պատասխանում է հանրային, քաղաքական գործիչ Գարեգին Միսկարյանը
– Պարո՛ն Միսկարյան, այս պահին Հատիս լեռան վրա շարունակվո՞ւմ են Քրիստոսի արձանի տեղադրման համար շինաշխատանքները, բազմաթիվ դիմումներ, նամակներ էիք ուղղել պատկան մարմիններին, ի՞նչ արձագանքներ ստացաք, ընդհանուր գործընթացն ի՞նչ փուլում է:
– Իմ տեղեկություններով՝ այս պահին Հատիսում շինաշխատանքներ չեն իրականացվում: Նախաձեռնությամբ հայտարարել էինք, որ դատարան ենք դիմելու, երեկ հայցն ուղարկել ենք վարչական դատարան: Պահանջը կամ խնդրանքն այն է, որ Հատիս հրաբխի վրա այն հողակտորները, որոնք ավագանու որոշմամբ օտարվել են, վերադարձվեն համայնքին, անվավեր ճանաչվի ավագանու որոշումը, որովհետև, ըստ էության, ավագանին այդ որոշումը կայացրել է ապօրինաբար, քանի որ Հողային օրենսգրքի համաձայն՝ այդ հողերն օտարելու իրավունք չկա. տվյալ օրենսգիրքն արգելում է որևէ կերպ օտարել բնության հուշարձան հանդիսացող տարածքը:
Հույս ունեմ, որ դատարանը հաշվի կառնի այն բոլոր փաստերը, որոնք մենք անհրաժեշտության դեպքում կներկայացնենք, ու կբավարարի հայցը, և այս թեման վերջնականապես կփակենք:
– Իսկ նախարարություններից, որոնց դիմել էիք, արձագանք ստացա՞ք:
– Մենք նախարարություններին հիմնականում տեղեկատվություն ստանալու համար էինք դիմել, ինչի համար դիմել էինք, պատասխանը ստացել ենք:
Միակ տեղեկատվությունը, որը հիմա մեզ անհրաժեշտ է, 2008 թվականին հողի օտարման հիմքերն են, այսինքն՝ այդ հողն ի՞նչ հիմնավորմամբ է օտարվել ու ե՞րբ, դրա վերաբերյալ ի՞նչ փաստաթղթեր կան: Ինչպես հասկանում եմ, համայնքապետարանը չունի այդ ինֆորմացիան՝ ի՞նչ հիմքով ու ինչո՞ւ է օտարվել, այսինքն՝ ըստ էության, դա էլ է ապօրինի օտարվել:
– Պարո՛ն Միսկարյան, ձեր ստացած տեղեկություններն ինչի՞ մասին են վկայում, գործընթացը, ինչպես ի սկզբանե պնդում էիք, ապօրինի՞ է:
– Այս գործն ամբողջությամբ ապօրինությունների փունջ է, ու կարծում եմ, որ միայն վարչական դատարանի որոշումով չպետք է բավարարվել: Մենք քննարկում ենք նաև հայցով դիմել ոստիկանություն՝ որպես հաղորդում հանցագործության մասին, ու եթե ոստիկանությունը շարունակի անգործություն դրսևորել, ապա պետք է դրա դեմն առնելու միջոցներ ևս կգտնենք, որովհետև այստեղ բազմաթիվ են օրենքի խախտումները:
Միայն այն, որ պատմամշակութային հուշարձանն ավերվել է, բավարար է, որ այս գործը քննվի, ու մեղավորները պատասխանատվության ենթարկվեն: Դաշտամիջյան ճանապարհների բարեկարգման անվան տակ այդ սարի հերն անիծել են, սրա համար ևս պետք է պատասխանատվության ենթարկվողներ լինեն:
Ենթադրում եմ, որ «Ծառուկյան» հիմնադրամն է ինքնագործունեությամբ զբաղվել ու առանց համապատասխան թույլտվության ավերել: Եթե դա հիմնադրամը չէ, այլ համայնքապետարանը, համայնքապետը պետք է պատասխան տա: Լուրջ քննություն անցկացնելու ու բացահայտելու խնդիր կա:
– Եթե նախաձեռնությամբ հանդես չգայիք, չդիմեիք դատարան, պատկան մարմիններից որևէ մեկը կձեռնարկե՞ր այն գործընթացները, ինչը հիմա դուք եք անում, չէ՞ որ բազմաթիվ բողոքներ եղան, որոշ նախարարություններ խոստացան հետևողականություն դրսևորել, ինչը, ըստ էության, չերևաց:
– Ապօրինի կառուցված ճանապարհով էկոնոմիկայի նախարար Վահան Քերոբյանը բարձրացել է լեռան վրա ու անձամբ մասնակցել ավերված պատմամշակութային հուշարձանի վրա անցկացվող հիմնարկեքին: Իսկ սա խոսում է այն մասին, որ կա՛մ Վահան Քերոբյանն անձամբ է հովանավորում այդ ապօրինությունները, կա՛մ ինքը կատարում է ինչ-որ մեկի պատվերը, որը, ենթադրում եմ, Նիկոլ Փաշինյանն է:
Այսինքն՝ այստեղ Հակակոռուպցիոն կոմիտեն մեծ աշխատանք ունի անելու, ու ես կարծում եմ, որ եթե անաչառ քննություն անցկացվի, ուսումնասիրվեն բոլոր հանգամանքները, կարող է պարզվել, որ Հայաստանի բարձրաստիճան անձինք հովանավորում են Գագիկ Ծառուկյանի կողմից իրականացվող ապօրինությունները:
– Իսկ վստահություն ունե՞ք, որ քննությունը անաչառ կանցկացվի, ու դատարանը կբավարարի ձեր հայցը:
– Դատարանը հիմքեր չունի մեր հայցը չբավարարելու, որովհետև ակնհայտ են այն օրենքների խախտումները, որոնց մենք հղում ենք արել, այսինքն՝ հետին թվով էլ չեն կարող շտկումներ անել:
Իսկ ինչ վերաբերում է Հակակոռուպցիոն կոմիտեի կողմից կատարվելիք քննությանը և բացահայտումներին, ես կարծում եմ, որ այնտեղ կա կամք նման տեսակի հովանավորչությունները բացահայտելու, եթե կան այդպիսիք, բայց վստահ չեմ, որ այդ մարմինն ունի բավարար լիազորություններ քննելու սույն գործը:
– Պարո՛ն Միսկարյան, իսկ «Գագիկ Ծառուկյան» բարեգործական հիմնադրամից ձեզ հետ կապ հաստատելու փորձեր եղե՞լ են, որովհետև, վստահաբար, տեղյակ են ձեր գործունեությունից:
– Տեղյակ են, ես իրենց նշել եմ ֆեյսբուքյան գրառմանս մեջ ու առաջարկել եմ կոմպրոմիսի ճանապարհ: Իվետա Տոնոյանը լրատվամիջոցներից մեկին տված հարցազրույցի ժամանակ ասել էր, որ իրենք տեղյակ են ու որ չեն հրաժարվելու այդ մտքից, որ արձանաշինությունը լինելու է՝ ի հեճուկս բոլոր պահանջների: Ինձ հետ կապ հաստատելու փորձեր չեն եղել, ինչը ողջունում եմ:
– Այսինքն՝ «պատերազմի եք պատրաստվում», ո՛չ դուք եք պատրաստվում զիջել, ո՛չ նրանք:
– Մենք զիջելու բան չունենք, որովհետև սա մեր պետությունն է ու այն իրավական է, ու պետք է մենք պայքարենք օրենքի գերակայության համար, մեր գործն արդար է, մենք մեր ճանապարհից շեղվելու ցանկություն չունենք:
– Եթե հետահայաց նայեք, իսկապես վստահություն ունե՞ք, որ կկարողանաք այս գործում հաջողել:
– Այն, որ արձանը չի կառուցվելու, վստահ եմ, բայց իմ նպատակը միայն դա չէ, այստեղ վնասները փոխհատուցելու ու մեղավորներին պատժելու խնդիր կա, թե որքանո՞վ իմ անձնական հեղինակությունը կամ հանրային լինելը, կամ Հատիսի պաշտպանության նախաձեռնության խմբի անդամների ազդեցությունը արդարադատության համակարգի վրա կլինեն ծանրակշիռ, ու որքանով նրանք անաչառ քննություն կանցկացնեն, ես դժվարանում եմ ասել, այդ հարցում առանձնապես լավատես չեմ: Բայց միևնույն է, մենք չենք ընկրկելու ու փորձելու ենք արդարության հասնել:
– Իսկ արձանի չկառուցվելու վստահությունը որտեղի՞ց, պարո՛ն Միսկարյան:
– Հենց օրենքների պահանջներից, որոնք արգելում են այդ հողակտորն օտարել, շինարարություն իրականացնել: Պետք է ասեմ նաև, որ ԿԳՄՍ ու շրջակա միջավայրի նախարարությունների հայտարարությունները հույս են տալիս մտածելու, որ այդ գերատեսչություններն էլ առանձնապես հետաքրքրված չեն այդ ծրագրով:
Այստեղ ավելի շատ, ասում եմ՝ էկոնոմիկայի նախարարության մատն է խառը՝ ի դեմս Վահան Քերոբյանի, և ինչ-որ տեղ նաև, գուցե, Նիկոլ Փաշինյանին են համոզել, որպեսզի այդ ծրագիրն իրականացվի՝ իբր թե որպես ներդրումների շռնդալի աղբյուր:
Քրիստինե Աղաբեկյան
MediaLab.am
