Օրերս աղմուկի կիզակետում հայտնված ԱԺ պատգամավորներ Լևոն Զուրաբյանն ու Վարդան Օսկանյանը, որոնց խոսակցությունն գաղտնալսվել, ձայնագրվել եւ անհայտ անձի կողմից տեղադրվել էր համացանցում, դիմել են դատախազություն:
Ինչպես տեղեկացնում է ilur.am լրատվական կայքը, Օսկանյանն ու Զուրաբյանը պաշտոնական գրություն են ներկայացրել դատախազություն, ուր մասնավորապես նշված է.
«Առաջարկում ենք մեր զրույցի ապօրինի գաղտնալսման և սոցցանցերում տեղադրման կապակցությամբ հարուցել քրեական գործ՝ հայտնաբերել և պատժել հանցագործության պատասխանատուներին: Կից ներկայացնում ենք այդ կապակցությամբ մեր կողմից արված հայտարարությունները:
ԱԺ պատգամավորներ Լևոն Զուրաբյան, Վարդան Օսկանյան»:
Հիշեցնենք, որ ձայնագրությունը հասարակական մեծ հնչեղություն ստացավ: Տարբեր քաղաքական գործիչներ մեկնաբանություններ եւ գնահատականներ տվեցին, ինչպես խոսակցությանն այնպես էլ գաղտնալսում երեւույթինՙ
«Հայաստանի ազգային անվտանգության ծառայությունը, կատարելով քաղաքական հակառակորդներին լրտեսելու եւ վարկաբեկելու Սերժ Սարգսյանի հակասահմանադրական հրամանը, ապօրինաբար գաղտնալսել է երկու ԱԺ պատգամավորներ` Վարդան Օսկանյանի եւ իմ մասնավոր զրույցը եւ Ինտերնետում տեղադրել այդ զրույցի ձայնագրությունից կցմցած մի նյութ, որն անմիջապես տարածվել է ռեժիմի շահերը անթաքույց սպասարկող լրատվամիջոցների կողմից»,-համացանցում տարածված աղմկահարույց ձայնագրությանն անդրադարձավ ՀԱԿ համակարգող Լեւոն Զուրաբյանն` հայտարարություն տարածելով:
Օսկանյանն հայտարարեց, որ եղածում, որեւէ «սկանդալային» բան չկա:
Նշենք, որ տարբեր լրատվամիջոցներին տրված հարցազրույցում Ազգային անվտանգության ծառայության մամուլի կենտրոնի ղեկավար Արծվին Բաղրամյանն հերքել է Զուրաբյանի հնչեցրած մեղադրանքը՝ ասելով, թե գաղտնալսման եւ ձայնագրության հետ ԱԱԾ-ն որեւէ առնչություն չունի եւ որ բոլոր մեղադրանքները մտացածին են ու անհիմն:
© Medialab.am