«Մեդիալաբի» հարցազրույցը ԱԺ «Իմ քայլը» խմբակցության պատգամավոր Հրաչյա Հակոբյանի հետ
– ԲՀԿ-ն հայտարարել է, որ Գագիկ Ծառուկյանի կալանավորումը քաղաքական հետապնդում ու հաշվեհարդար է: Նաև նշվում է, որ ԲՀԿ այլ անդամներ ևս թիրախի տակ են: Դուք ինչպե՞ս եք գնահատում այս հայտարարությունները:
– Բազմիցս ասվել է, որ ԲՀԿ-ի ակտիվացումն էր այս քրեական գործերի հետևանք, այլ ոչ այս քրեական գործերը՝ ԲՀԿ-ի ու Գագիկ Ծառուկյանի ակտիվացման հետևանք: Այնպես որ, սա է իրական տրամաբանությունը:
Ինչ վերաբերում է կոնկրետ քրեական գործին, ես կարող եմ միայն մի բան ասել, որ սա շատ կարևոր երևույթ եմ համարում այն առումով, որ Հայաստանում այլևս երբեք որևէ քաղաքական ուժ, քաղաքական գործիչ, ոչ մի մեծահարուստ ընտրակաշառքներով չընտրվի խորհրդարանում կամ այլ պաշտոնների:
Ընդհանրապես, ընտրակաշառքը պետք է բացառվի մեր քաղաքական կյանքից ու մեր երկրից: Պետք է հնարավորն արվի, որ դա տեղի չունենա, և այս գործը դրան հասնելու ճանապարհն է: Կարծում եմ, որ այս դեպքից հետո շատ մարդիկ արդեն կհասկանան, որ ուղղակի չի կարելի ընտրակաշառք տալ:
– Չե՞ք կարծում, որ սա կարող է հանրային տրամադրություններ լարել՝ հաշվի առնելով, որ հոկտեմբերի 8-ին ընդդիմադիր եռյակը մտադիր է հանրահավաք կազմակերպել, և այս քայլի հետևանքով այն կարող է սպասվածից թեժ լինել:
– Չեմ կարծում, որովհետև լայն հանրային կարծիքը այս ամենի հետ կապված այն է, որ եթե կա քրեական գործ, եթե մարդիկ ընտրակաշառք են բաժանել, իսկ կարծում եմ՝ բոլորը գիտեն, որ ԲՀԿ-ն ընտրակաշառք է բաժանել, ապա դա չի կարող դիտվել որպես քաղաքական հետապնդում:
Անգամ իրենց հետ հանրահավաք անողներն են ասում, որ, այո՛, իրենք ընտրակաշառք են բաժանել: Ինչ վերաբերում է հանրահավաքի թեժ լինելուն, ապա կլինեն այնտեղ մարդիկ, որոնք իրենց շահը հետապնդելով՝ կփորձեն ինչ-որ բոցաշունչ ելույթներ ունենալ, բայց մեծ հաշվով դա որևէ վտանգ չի ներկայացնում:
– Ժամանակին, երբ սերտ հարաբերություններ էին իշխանությունների և ԲՀԿ-ի միջև, դուք ընտրակաշառքի մասին չէիք խոսում:
– Մենք միշտ ենք խոսել ընտրակաշառքի մասին, իսկ հիմա ոչ թե խոսում ենք, այլ փաստեր հրապարակվեցին, փաստաթուղթ հրապարակվեց, գործ հարուցվեց, քննություն է ընթանում: Ընդհանրապես, ընտրակաշառքի մասին մենք միշտ ենք խոսել:
– Այս իրադարձությունները մինչև ո՞ւր կարող են տանել: Հաշվի առնելով, որ այլ ԲՀԿ-ականների նկատմամբ ևս քրեական գործեր կան, այստեղ քաղաքական միտում չե՞ք տեսնում:
– Որևէ քաղաքական միտում չկա: Չեմ կարծում, թե ԲՀԿ-ն երբևէ որևէ վտանգ է ներկայացրել իշխանության համար: Չնայած մենք երբեք չենք գնա նրան, որ քաղաքական հետապնդումներ լինեն, բայց առավել ևս ԲՀԿ-ի դեպքում դրա անհրաժեշտությունը չկա:
Նրանք ուզում էին գնալ Սերժ Սարգսյանի ժամանակվա սցենարով, որ գնային մեզ հետ սակարկումների, որ, օրինակ՝ Գագիկ Ծառուկյանը ինչ-որ զիջումների դիմաց հայտարարեր, որ քաղաքական էջը փակված է համարում, ինչպես դա արեց 2015-ին, բայց մենք չգնացինք այդ ճանապարհով: Եթե կա քրեական գործ, ապա դա պետք է քննվի մինչև վերջ:
– ԲՀԿ-ի, ՀՅԴ-ի ու «Հայրենիքի» համատեղ հանրահավաքից ընդհանրապես վախեր կայի՞ն: Իշխանությունը կարո՞ղ էր այդ հանրահավաքի հետ կապված մտահոգություններ ունենալ և, դրանով պայմանավորված, կալանավորեր Ծառուկյանին:
– Այդ հանրահավաքից միակ վախն այն է, որ կորոնավիրուսը չտարածվի:
– Ձեր կարծիքով՝ Ծառուկյանի կալանավորումից հետո ներքաղաքական ցնցումներ չե՞ն սպասվում:
– Կարծում եմ՝ որոշ ժամանակ ինչ-որ ակտիվություն կտեսնենք, որից հետո ամեն բան կհանդարտվի:
Մանե Հարությունյան
MediaLab.am
