«Երբ ժողովուրդը ոտքի կկանգնի, նոր կկարողանան ուղղորդել իրենց». Գալուստ Սահակյան

«Երբ ժողովուրդը ոտքի կկանգնի, նոր կկարողանան ուղղորդել իրենց». Գալուստ Սահակյան
«Երբ ժողովուրդը ոտքի կկանգնի, նոր կկարողանան ուղղորդել իրենց». Գալուստ Սահակյան

«Մեդիալաբի» հարցերին պատասխանում է ԱԺ ՀՀԿ խմբակցության ղեկավար Գալուստ Սահակյանը:

-Պարոն Սահակյան, ՀՀԿ խմբակցությունն դեմ քվեարկեց ընդդիմադիր ուժերի՝ Մարտի մեկի հարցով ԱԺ ժամանակավոր հանձնաժողով ստեղծելու նախաձեռնությանը: Մեծամասնությունը փաստացի տապալեց հանձնաժողովի ստեղծումը, ինչո՞ւ, կողմ չե՞ք բացահայտումներին:

Ես կարծում եմ՝ ամենաշատը մեզ է հետաքրքրում այդ հարցը: Մենք ունեցել ենք երեք հանձնաժողովներ, բոլոր նյութերին ծանոթացել ենք, բոլոր քաղաքական գնահատականները տրված են: Պարզապես այս նախագծով հիմնական միտումն այն էր, որ իբր թե իրավապահ բլոկին պիտի կարողանան հարցաքննության ենթարկեն, որպեսզի կարողանան նաև հետքեր գտնեն:

Մենք կարծում ենք, որ դա ճանապարհ չէ: Առավել ևս ես հայտարարեցի, որ բոլոր քաղաքական ուժերը նախկին հանձնաժողովի եզրակացության տակ ստորագրել են: Այսինքն՝ համաձայնվել են այն պրոցեսներին, որոնք արձանագրվել են տեքստում: Այսօր դա քաղաքական պրովոկացիայի խնդիր ուներ իր մեջ: Մասնավորապես, այս նստաշրջանում երկրորդ ընթերցմամբ քննարկվում է Գլխավոր դատախազի հաշվետվության հարցը:

Մենք կսպասենք, կհամբերենք, դատախազը հաշվետվություն կտա, խորհրդարանականներն իրենց հարցերը կտան: Ես համոզում ունեմ, որ հանձնաժողովը չի կարողանալու ինչ-որ մի բան ապացուցել, որովհետև պրոֆեսիոնալ մարմին չէ և չի էլ կարող լինել: Դատախազի հաշվետվությունից հետո նոր կմտածենք՝ հանձնաժողով լինի կամ չլինի: Վերջին հաշվով նաև նախկին հանձնաժողովում բոլոր քաղաքական ուժերը դերակատարում ունեին, բայց այսօր միևնույն է, մենք ենք պատասխան տալիս: Մենք այդ պատասխանատվությունից չենք խուսափում, եթե լիազորված մարմինները քննության առնեն միտինգների կազմակերպիչներին, որոնք ականատես էին այդ ամեն ինչին, կարծում եմ, ինչ-որ մի բան կբացահայտվի նաև իրենց հարցաքննություններից: Դրա համար մենք, չեմ կարծում, որ մեր երկրի խնդիրները պիտի թողնենք և ենթարկվենք ընդդիմադիր կողմի պրովոկացիոն քաղաքականությանը: Նման տիպի հանցագործությունները կկարողանան բացահայտել միայն լիազորված մարմինները, այսինքն՝ իշխանությունը:

Այսինքն՝ մենք իշխանության թիմ ենք և այդ պարտավորվածությունն ունենք: Եթե նույնիսկ այս հանձնաժողովը կազմավորվեր, միևնույն է, վերջում պետք է իրենք իրենց խոսքն ասեին կամ իրենց միտումները ցուցաբերեին, այդ պատասխանատվությունը նորից մերն է: Դրա համար ոչ թե պիտի պատասխանատվության շրջանակներում դա քննարկվի, այլ մեղավորների հայտնաբերման խնդիր գոյություն ունի, այդ մեղավորները կուսակցությունների մեջ կամ քաղաքական թիմերի մեջ ակնհայտորեն չկան: Պիտի կարողանան ընդամենն ակնատեսներին հրավիրել, քննարկել խնդիրը, որը դեռևս չի կատարվել: Իսկ դա միայն կարող են իրենց լիազորությունների շրջանակներում լիազոր մարմիններն իրագործեն: Այս օրինագով նաև ասում են՝ մենք ուզում ենք հետամուտ լինել և ստուգել, քննարկել իրավապահ մարմիններին, որը հակասում է Սահմանադրությանը: Չի կարելի Ազգային ժողովում մի նոր օջախ ստեղծել, որը իրավական դաշտի կամ իրավական մոտեցումներից առավել մի դաշտ է, որն արդյունքներ չէր ունենալու: Վերջում էլի պատասխանատուն մենք ենք, այսօր էլ ենք մենք պատասխանատու և մեր պատասխանատվության շրջանակներում հանձնառություն ունենք բացահայտումների և կկարողանանք թիմի ներսում, թիմի միջոցներով այդ խնդիրը լուծել, եթե հնարավոր է: Այդ իսկ պատճառով դեմ քվեարկեցինք:

– ՀԱԿ խմբակցության ղեկավար Լևոն Զուրաբյանը հայտարարեց, որ գուցե սա իշխանությունների վերջին շանսն էր՝ որևէ որոշում կայացնելու: Զուրաբյանը հնարավոր համարեց իշխանափոխությունը, նրա այս հայտարարությանն ինչպե՞ս եք արձագանքում:

-Լևոն Զուրաբյանը կամ զուրաբյանները շատ փոքր մարդիկ են, որպեսզի քաղաքականության անդամ ընդգրկվեն: Դրանք ցանկություններ են, առաջարկություններ են, միտումներ են, պրովոկացիոն գործիքներ օգտագործող թիմ են: Մարդիկ, եթե պատասխանատվություն չունեն մի հարցի վերաբերյալ, ամեն ինչ կարող են խոսել: Հետո ամոթ է, որ մեր երկիրում զուրաբյանները կամ ըտենց սեթևեթող քաղաքական գործիչները պիտի կարողանան ինչ-որ հիմնավորումներ գտնեն:  Հիմնավորումներ գտնելու համար արդեն գարուն է, կարող են մոտենալ հողագործներին, ասեն իրենց տեսակետը, իրենց քննարկելի առարկաները: Մարդիկ մտածում են, որ Ազգային ժողովի խոսափողը կամ Երևանի միտինգները կկարողանան օգտագործել և պետությունն ամրապնդել, մենք այդ կարծիքին չենք: 

  
Դա մենք շատ դրական ենք գնահատում և բազմաթիվ տարիներ անընդհատ ասել ենք, որ քաղաքական դաշտը մեկն է և այդ դաշտում բոլորը պետք է համագործակցեն, քննարկեն, որոշեն, ցանկություններ ասեն, առաջարկություններ ասեն: Այդ իմաստով, կարծում եմ, որ շատ դրական է: Բայց միևնույն ժամանակ, մինչև այդ, հասարակությանը պիտի ասեն, թե ինչի՞ համար են համախմբվում, մանավանդ նախկինում շատ-շատ դեպքերում համախմբվել են և բավականին իշխանության լծակներ են ունեցել, և Դաշնակցությունը, և Բարգավաճ Հայաստանը, պիտի կարողանան նաև դրանից դասեր քաղեն՝ արդյոք ի՞նչ են արել, ինչ հաջողության են հասել: Թե՞ ըտենց փափկասուն կարողացել են իշխանության մեջ լինել, հետո խռովել, հեռացել են: Իհարկե, ես էդ կարծիքին չեմ, բայց իրենց մեկնաբանությունները հասարակության համար անհրաժեշտ են:

-Արդեն հայտարարել են, ՀԱԿ-ում ասում են՝ իրենց համախմբման վերջնական նպատակը իշխանափոխությունն է: Լևոն Զուրաբյանը հայտարարեց, որ ԲՀԿ-ն ընդդիմադիր ուժ է, որը իրենց կողքին է:

-ՀԱԿ-ի դիտարկումները մեր քաղաքական դաշտի համար հիմնավոր չեն կարող լինել: Ընդամենը Բարգավաճ Հայաստանի թիկնոցի տակ չի կարելի անընդհատ գործառույթներ կազմակերպել: Բարգավաճ Հայաստանը առաջիկայում, կարծում եմ, պիտի կանխորոշի և ասի իր կարծիքը: Նաև պիտի հանգամանքների բերումով հետևյալն ասի՝ վերջիվերջո այդ ճանապարհային քարտեզի, մոտեցումների, քաղաքական համաձայնությունների հիմնադիրները Հանրապետական կուսակցության անդամներն են, որոնց այդ ամբողջ ընթացքում աջակցել են նաև իրենք, մասնակից են դարձել, ունեցել են լծակներ և պիտի կարողանային ինչ-որ մի բան անեին: Ես չեմ կարծում, որ ինչ-որ մի բան չեն արել: Իրենք այս գործառույթով, եթե պարզ ծրագրեր չեն ասում, իրենք հակասում են իրենց գործառույթներին ընդամենը:

-Այսինքն՝ հնարավոր չե՞ք համարում նրանց հայտարարած վերջնական նպատակի իրագործումը, այն է՝ իշխանափոխությունը:

-Իշխանափոխություն կատարում է ժողովուրդը, ոչ թե… Երբ որ ժողովուրդը ոտքի կկանգնի, իսկ կանգնելու համար ժողովուրդը պիտի կարողանա քաղաքական ուժերի սկզբունքներն ու գաղափարները իրենցը դարձնել, սեփականություն, որպեսզի ոտքի կանգնեն, նոր հետո կկարողանան ուղղորդել իրենց: Իրենք հակառակ ծայրից են գնում՝ ոտքի կանգնացնենք ժողովրդին մեր շահերի համար ընդհանուր: Դա այդպես չի կարող լինել, ոչ էլ այդ ազգն այնպիսին է, որ մտածում է, որ շատ մեծ ցանկություններ ունեն, եթե այդ ցանկությունները չեն գնահատում, ուրեմն իշխանափոխություն: Ավելի շատ հակված եմ մտածելու, որ ժողովուրդը մտածում է՝ ինչ հնարավորություններ կան և ինչ վիճակ է իրենց համար ստեղծվել: Այդտեղ արդեն խնդիր կա, որը քննարկման արժանի է:

Մարի Ներսեսյան

© Medialab.am