«Մեդիալաբի» հարցերին պատասխանում է իրավապաշտպան Նինա Կարապետյանցը
– Տիկի՛ն Կարապետյանց, խորհրդարանում կրքերը չեն հանդարտվում, արդեն միմյանց վրա ջրի շշեր են նետում: Ինչպե՞ս եք գնահատում Ազգային ժողովում երեկ ու այսօր տեղի ունեցածը:
– Ազգային ժողովում ունենք ուժեր, որոնց պետական խնդիրները բացարձակ չեն հետաքրքրում, նրանք զբաղված են անձնական վրեժխնդրություններով ու հարցեր լուծելով: Բացի այս, կարծում եմ, որ սա պատահական չէ: Այստեղ կա պայմանավորվածության տարր, այս արտաքին գզվռտոցները ոչինչ չեն նշանակում, այս բոլորը միտված են բացառապես ուշադրությունը շեղելու և այլ ուղղություններով տանելու, հանրությունից մի շարք կարևոր հարցեր հետին պլան մղելու, որովհետև ԱԺ-ում մի քանի օր շարունակ խուլիգանական զբաղվածության դրսևորումը չի կարող չծածկել երկրի առաջ ծառացած խնդիրները նրանց համար, ովքեր չեն կարողանում տարբերակել առաջնայինը երկրորդայինից:
– Երեկվա միջադեպի հետ կապված՝ կա՞ր պատգամավորի իրավունքների ոտնահարում, անվտանգության աշխատակիցների գործողությունների անիրավաչափությո՞ւն:
– Ամենայն բացասական վերաբերմունք ունենալով «Պատիվ ունեմ» դաշինքի նկատմամբ ու համարելով, որ նրանք առհասարակ ոչ մի իրավունք չպետք է ունենային առաջադրվելու և ընտրություններին մասնակցելու, որովհետև այն մարդիկ չէին, որ պետք է իրավունք ունենային խորհրդարանում լինելու, այդուհանդերձ, համարում եմ, որ Աննա Մկրտչյանին վերաբերող գործողությունները տեղին չէին:
Այն, որ հարցը դուր չեկավ Ալեն Սիմոնյանին կամ կարող էր դուր չգալ Նիկոլ Փաշինյանին, բնավ չէր նշանակում, որ կարելի էր խոսքի իրավունքից զրկել: Երկրորդը՝ խայտառակություն էր, որովհետև ոչնչով պայմանավորված չէր այդպիսի ծավալի ուժով փորձել քաշքշել մարդուն, դուրս շպրտել պատգամավորին նիստերի դահլիճից: Սա խայտառակություն է և հետնահանջ ժողովրդավարությունից, մենք ականատես ենք լինում ռազմականացված Ազգային ժողովի, համազգեստով մարդիկ բռնի ուժով պատգամավորի են դուրս շպրտում, սա խայտառակության վերջն է:
Խայտառակություն էր նաև հեռարձակումներն անջատելը, լրագրողներին բռնի ուժով օթյակից հանելը: Սա ևս գալիս է ապացուցելու, որ մենք ժողովրդավարությունից ոչ թե հետքայլ ենք անում, այլ սրընթաց վայր ենք ընկնում:
– Ստացվում է, որ եթե իշխանությանը դուր չի գալիս ընդդիմադիրների ասած ինչ-որ միտք, դա լռեցնում են անվտանգության աշխատակիցների միջոցով, ընդդիմությունն էլ իր հերթին է որոշակի նախաձեռնություններով հանդես գալիս: Այս ամենն ինչի՞ է հանգեցնելու, տիկի՛ն Կարապետյանց:
– Նրան, որ ունենալու ենք ավելի ծանր վիճակ Հայաստանի համար, քան ունենք այսօր: Այս խորհրդարանով մենք գնալու ենք վատթարագույն ճանապարհով, որովհետև փոխարենը խնդիրներ լուծեն, իրար վրա շշեր են շպրտում ու խուլիգանական պահվածք դրսևորում:
Այսպիսի պահվածք իրենց հայաթներում կարող են թույլ տալ, բայց ոչ ԱԺ-ում: Այդ մարդիկ՝ բոլորն անխտիր, ուղղակի անհայրենիք մարդիկ են, որովհետև հայրենիքի մասին մտածողն այդպիսի վարքագիծ չի դրսևորի:
– Խորհրդարանական ուժերը միտումնավո՞ր են նման վարքագիծ դրսևորում:
– Երկու կողմն էլ ուղղակի դիտավորություն ունի: Իրենց անհրաժեշտ է ուշադրությունը շեղել շատ կարևոր հարցերից, որոնք այժմ Հայաստանի վերաբերյալ ընթանում են, և քիչ չէ, որ այս տեղեկությունը թաքցնում են, նաև այսպիսի խուլիգանական գործողություններով փորձում են ուշադրությունը շեղել և դա անում են համատեղ՝ երեքն էլ միասին:
– Տիկի՛ն Կարապետյանց, մտավախություն չունե՞ք, որ խորհրդարանում կատարվողը՝ բոլոր առումներով, կարող է դրսևորվել նաև այդ շենքի պատերից դուրս:
– Մենք արդեն իսկ տեսանք Ֆիզիկայի գիտավանի հետ կապված ինչպիսի անհամաչափ գործողությունների գնացին, և, փաստացի, վարչապետը թիվ մեկ ամբիոնից հայտարարեց, որ ինքը իրավապահ մարմինների այդպիսի վարքագծի ջատագովն է: Հետևաբար բռնությունն այլևս չեմ բացառում:
Երբ կար հնարավորություն այդ հանցավոր բարքերից ազատվելու՝ չարվեց, իսկ չարվեց դիտավորությամբ, որպեսզի այսօր այդ նույն գործիքակազմն օգտագործեն հենց իրենք: Իրենց պետք էր այն ոստիկանը, որը քաղաքացի էր ծեծում, ու մոլորության մեջ են գցում իրենց մանդատով: Որևէ մանդատ՝ լինի պողպատյա, թե ոսկյա, երբեք թույլ չի տալիս ՀՀ քաղաքացու նկատմամբ բռնություն կիրառել և այդ մանդատով այն արդարացնել:
Քրիստինե Աղաբեկյան
MediaLab.am
