«Մեդիալաբի» հարցերին պատասխանում է իրավապաշտպան Վարդան Հարությունյանը
– Պարո՛ն Հարությունյան, Երևան քաղաքի առաջին ատյանի ընդհանուր իրավասության դատարանը վարույթ է ընդունել ապօրինի ծագում ունեցող գույքի բռնագանձման վերաբերյալ առաջին հայցադիմումը: Ինչպե՞ս եք սա գնահատում, կարո՞ղ ենք ասել, որ այս առումով սայլը տեղից սկսել է շարժվել:
– Գուցե կարող ենք, սա դեռ առաջին գործն է այս մասով, իհարկե դրական է, որ այս ուղղությամբ քայլեր են արվում, բայց պետք է դրանք լինեն լուրջ ու ծանրակշիռ քայլեր: Հուսանք, որ այս գործընթացը կշարունակվի, քննությունը կլինի թափանցիկ ու արդարացի, ինչն ամենակարևորն է:
– Իրավական համակարգի այսօրվա վիճակը ձեզ թո՞ւյլ տալիս է մտածել, որ, ինչպես նշեցիք, կունենանք արդար ու թափանցիկ քննություն:
– Գիտեք, շատ են եղել դեպքեր, շատ ենք մենք ոգևորվել, այնուհետև հիասթափվել: Ոգևորիչ որևէ բան չեմ կարող ասել, զերծ կմնամ կանխատեսումներ անելուց: Պետք է սպասենք դեպքերի զարգացմանն ու ընթացքին. սա կլինի առաջին ու միա՞կ դեպքը, թե՞ շարունակություն կունենա, ու ինչպիսի՞ն կլինի այն: Համբերատար սպասել է պետք նոր զարգացումների:
– Պարո՛ն Հարությունյան, եթե անաչառ քննություն իրականացվի, ապա ապօրինի գույքի բռնագանձման դեպքերը, ըստ ձեզ, Հայաստանում շա՞տ կլինեն:
– Այո՛, մեր երկրում նման դեպքերը շատ են լինելու, բայց եթե մոտեցումն այդ գործերին չի լինի քաղաքական, չի լինի պատվիրված, այլ կլինի արդարացի, ապա կարող ենք հանգիստ վերաբերվել դրան ու չդարձնել դա նույնիսկ հարցազրույցի նյութ, դա պետք է լինի առօրյա կյանք:
– Ճի՞շտ հասկացա, որ չեք բացառում, որ նմանատիպ գործերը կարող են քաղաքական նպատակներով օրակարգ բերվել:
– Ո՛չ, ես ասացի, եթե նման նպատակներով չլինեն, եթե դա չքաղաքականացվի, այլ լինի սովորական, առօրյա կյանք, ապա շատ լավ կլինի:
– Հնարավոր չէ՞ր հեղափոխությունից հետո նույնաբովանդակ մի քանի դեպքեր արդեն վերջնարդյունքով ունենալ, կամ ավելի շատ գործեր արդեն վարույթում լինեին, պարո՛ն Հարությունյան, եթե այո՝ ինչո՞ւ չունենք:
– Հնարավոր էր իհարկե: Իսկ չունենք, որովհետև, չեմ կարծում, թե եղել է հեղափոխություն, կարծում եմ՝ իշխանափոխություն է եղել, եթե լիներ հեղափոխություն, ապա նման շատ գործեր կունենայինք:
Հեղափոխության պարագայում միայն այս բնագավառում չէ, որ փոփոխություններ կլինեին, այլ ամբողջ պետական համակարգում կլիներ լուրջ, ծանրակշիռ փոփոխություն, ամենակարևորը՝ կարծում եմ, պատերազմ կարող էր չլինել:
Քրիստինե Աղաբեկյան
MediaLab.am
