«Եթե նույնիսկ և՛ քրդերի, և՛ հայերի կողմից սխալներ լինեն, պետք է մեկը մյուսի նկատմամբ ներողամիտ լինի». ԱԺ պատգամավոր

«Մեդիալաբի» հարցերին պատասխանում է ԱԺ «Քաղաքացիական պայմանագիր» խմբակցության պատգամավոր, Հայաստանի քրդաբնակ համայնքի ներկայացուցիչ Կնյազ Հասանովը

– Պարո՛ն Հասանով, թեպետ Հայաստանի պետական կառույցները հերքում են, բայց քրդական մամուլը տեղեկություններ է հայտնում, որ Հայաստանը ազգությամբ քուրդ Աթիլա Չիչեքին և Հուսեյին Յըլդրըմին փոխանցել է Թուրքիայի իշխանություններին: Դուք փորձե՞լ եք պարզել՝ ինչ է կատարվել իրականում:

– Քրդական բանվորական կուսակցության թևը հայտարարել է, որ Հայաստանի իշխանություններն են փոխանցել երկու ազգությամբ քուրդ զինյալներին: Թուրքիայի իշխանություններն էլ իրենց հերթին տեղեկացնում են, որ իրենց հետախուզական գործողությունների շնորհիվ սահմանն անցնելիս բռնվել են այդ քուրդ ազատամարտիկները: Չեն ասում՝ որևէ կողմից արտահանձնվել են կամ այլ բան:

Շատերը Հայաստանի իշխանություններին են քննադատում, որ նրանք են արտահանձնել այդ անձանց: Ես երեկվանից սպասում եմ, որ Հայաստանի իշխանություններն արձագանքեին, և ԱԱԾ-ն ասաց, որ այդ խոսակցությունները սադրանք են, որևէ հիմք չկա ասելու, որ ԱԱԾ-ն է նրանց փոխանցել Թուրքիայի իշխանություններին, այսինքն՝ հերքեցին: Հերքեց նաև արդարադատության նախարարությունը:

– Այսինքն՝ Հայաստանի իշխանությունները կատարվածի հետ կապ չունե՞ն, նրանց կողմից հանձնում կամ արտահանձնում չի՞ եղել:

– Հայաստանի պետական կառույցները հերքում են իրենց առնչությունը: Այդ բանը հայտարարել է միայն Քրդական բանվորական կուսակցությունը: Բայց ոչ ոք՝ ո՛չ Թուրքիայի, ո՛չ էլ Հայաստանի իշխանությունները չեն ընդունում, որ արտահանձնում է կատարվել:

Դրա համար մենք ուշիուշով հետևելով՝ չեմ կարող ասել արտահանձնում կատարվել է, թե չէ: Մենք նաև դիմել ենք Քրդական բանվորական կուսակցության ներկայացուցիչներին, որ եթե նրանք ունեն փաստարկներ, ներկայացնեն: Մենք դրանց մասին կներկայացնենք հանրությանը:

– Պարո՛ն Հասանով, ուզում եմ հասկանալ՝ դուք ունե՞ք կասկածներ՝ Հայաստանի իշխանությունները քուրդ զինյալներին փոխանցե՞լ են Թուրքիայի իշխանություններին, թե՞ նշած հերքումները փարատել են ամեն ինչ:

– Ես խելացի անձնավորություն եմ, Հայաստանի քրդական ազգային խորհրդի նախագահն , ԱԺ պատգամավոր, Հայաստանի և Թուրքիայի իշխանություններն ասում են, որ արտահանձնում չկա, Հայաստանի կողմից փոխանցում չի եղել: Իսկ ենթադրություններով չեմ կարող ասել՝ Հայաստանի իշխանությունները արտահանձնում կատարե՞լ են, թե՞ ոչ:

Ես փաստերից ելնելով հավատում եմ, որ արտահանձնում չի եղել, եթե որևէ պետական կառույց իր վրա պատասխանատվություն չի վերցնում, որ փոխանցում է կատարվել, ես բարոյական իրավունք չունեմ, որ ասեմ՝ արտահանձնում կատարվել է:

Մենք կդիմենք Քրդական բանվորական կուսակցությանը՝ պարզելու՝ ինչ փաստարկների հիման վրա են նման հայտարարություն անում, հիմնավորումներ կպահանջենք: Եթե դրանք ճշմարիտ լինեն՝ հանրությանը կիրազեկենք:

– Եթե դրանք ճշմարիտ լինեն, ձեզ շա՞տ կմտահոգեն:

– Եթե ճշմարիտ լինեն, ու բոլորն ապացուցված լինեն, իհարկե կմտահոգեն, ո՞նց չեն մտահոգի: Մեր քուրդ ազգն է, ես չեմ ուզում, որ մեր քուրդ և հայ եղբայր ժողովուրդների միջև նման խոսակցություն գնա, վատ վերաբերմունք լինի: Շատ նուրբ, զգայուն հարց է, և մեր ժողովուրդները պետք է իմաստություն ունենան, որ ճիշտ գնահատեն այս երևույթները: Եթե նույնիսկ երկու կողմից սխալներ լինեն, պետք է մեկը մյուսի նկատմամբ ներողամիտ լինեն:

– Դուք առաջարկում եք չնեղանա՞լ հայկական կողմից:

– Ես ասում եմ, որ հայ և քուրդ ժողովուրդների դարավոր բարեկամության վրա որևէ կետ, որևէ բիծ չեմ ուզում տեսնել:

– Ձեր ընդդիմադիր գործընկերներն ասում են, որ իշխող ուժը, որին դուք ներկայացնում եք խորհրդարանում, Թուրքիայի իշխանություններին է հանձնել ձեր ազգակից զինյալներին:

– Չեմ ուզում նրանց հայտարարություններին գնահատական տալ: Ընդդիմությունը նրա համար է, որ պետք է քննադատի իշխանությանը, իշխանությունն էլ նրա համար է, որ պետք է ճշտապահ լինի ու բոլոր հարցերը օրենքի սահմաններում լուծի: Բոլորն ունեն իրենց կարծիքը, բայց այդ կարծիքները պետք է լինեն ճշմարիտ, փորձված ու իմաստալից: Ընդդիմությունը քննադատում է, ես չեմ կարող ասել՝ ինչու եք քննադատում: Մարդու իրավունքների հետ գործ ունենք:

Ուզում եմ կրկնել, որ եթե լիովին համոզված չեմ, ամեն ինչ օրենքի սահմաններում ապացուցված չէ, ես չեմ կարող մեղադրել իշխանություններին, ընդդիմադիրներին կամ մեր Քրդական բանվորական կուսակցությանը: Ես չգիտեմ՝ նրանք ինչ փաստարկներ ունեն, ինչի հիման վրա են այդ հայտարարությունն արել: Իմանայի՝ ճշմարտությունը ձեզ կասեի:

Հասմիկ Համբարձումյան

MediaLab.am