Սպառնալիքներ-հակազդեցություն. Սերժ Սարգսյանը Երեւան-Ստեփանակերտ թռիչքի առաջին ուղեւորը կլինի՞

Սպառնալիքներ-հակազդեցություն. Սերժ Սարգսյանը Երեւան-Ստեփանակերտ թռիչքի առաջին ուղեւորը կլինի՞
Հայաստանի նախագահ Սերժ Սարգսյանը մարտի 31-ին լրագրողների հետ հանդիպման ժամանակ հայտարարել է, որ Երևան-Ստեփանակերտ ավիաթռիչքի առաջին ուղևորն ինքն է լինելու:
Սարգսյանն այդ մասին հայտարարել է Հայաստանում գտնվող Շվեյցարիայի նախագահ Միշլին Կալմի Ռեյի հետ հանդիպումից հետո կայացած մամուլի ասուլիսի ժամանակ:

«Լեռնային Ղարաբաղի բնակչությունն իրավունք ունի օգտվելու օդային տրանսպորտի ծառայությունից։ Այստեղ որևէ կասկած չկա»,- հայտարարել է Սերժ Սարգսյանը՝ ավելացնելով, որ կասկածից վեր է, որ Հայաստանի և Լեռնային Ղարաբաղի իշխանություններն այդ խնդիրը պետք է համապատասխանեցնեն պատկան մարմինների հետ։ Սերժ Սարգսյանը նաև վստահություն է հայտնել, որ այս գործընթացն ունենալու է իր դրական ավարտը։

Այս տարվա մայիսի 9-ին` ի պատիվ Շուշիի ազատագրման տարելիցին, նախատեսվում է Ստեփանակերտի վերակառուցված օդանավակայանի վերաբացումը, սակայն չվերթների անվտանգության հարցը դեռևս լուծված չէ:

Ադրբեջանական կողմն արդեն հայտարարել է, որ հարվածելու է դեպի Ստեփանակերտ ուղևորվող ինքնաթիռներին:

Ադրբեջանի քաղաքացիական ավիացիայի պետական վարչության ղեկավար Արիֆ Մամեդովը հայտարարել էր, որ եթե Ղարաբաղի իշխանությունները վերաբացեն Ստեփանակերտի օդանավակայանը, ապա Ադրբեջանը հարվածներ կհասցնի Լեռնային Ղարաբաղ ուղևորվող օդանավերին:

«Լեռնային Ղարաբաղի օդային տարածքը գտնվում է Ադրբեջանի իշխանությունների տնօրինության տակ, այն փակ է, և համաձայն «Ավիացիայի» մասին օրենքի` մենք կարող ենք վերացնել օդանավերը, որոնք ուղևորվում են այդ տարածաշրջան»,- ըստ «Ֆրանսպրեսի» ասել է Մամեդովը:

Բաքվից հնչող հայտարարություններին ի պատասխան Սերժ Սարգսյանը արձագանքել է. «Այդպիսի հայտարարություններ աշխարհի նորօրյա պատմության մեջ եղել են և քիչ չեն եղել։ Բայց այստեղ մի բայց կա. այդ հայտարարությունները միշտ հնչել են ահաբեկչական կազմակերպությունների կողմից, պետությունների կողմից նման հայտարարություններ չեն հնչել»։

Սերժ Սարգսյանը Ադրբեջանի նման հայտարարությունները որակել է «մարազմ, հիվանդ մարդկանց ելույթներ, ժամանակավրեպ բաներ»։

«Ես հայտարարում եմ, որ առաջին չվերթի առաջին ուղեւորը լինելու եմ ես` Հայաստանի նախագահը»,-ասել է Սերժ Սարգսյանը:

Սարգսյանի`Ստեփանակերտի առաջին ուղեւոր լինելու մասին հայտարարությունը արդեն իսկ քննարկումների տեղիք է տվել Հայաստանում` թե քաղաքական շրջանակներում, եւ թե սոցիալական ցանցերում: Ոմանք, մեծ ոգեւորությամբ որակել են նրա խոսքերը որպես «հերոսական», «նախագահին վայել պահվածք» եւ որ «նախագահը ամեն ինչում պետք է առաջինը լինի»:

Շատերն էլ ձեռնպահ են մնացել գնահատականից` սպասելով թռիչքի օրվան եւ հնարավոր զարգացումներին:

Քաղաքական վերլուծաբան Հրանտ Մելիք-Շահնազարյանն համոզված է, որ նման իրավիճակում Սերժ Սարգսյանի հայտարարությունն ամեն դեպքում ամենաճիշտ մոտեցումն է:

«Ադրբեջանական կողմի ահաբեկչական քարոզչության պայմաններում Սերժ սարգսյանի հայտարարությունը ամենաճիշտ հակազդեցությունն է,- «Մեդիալաբին» ասում է նա,-Շատ լավ է, որ նախագահն առաջնորդում և ոգևորում է ժողովրդին վտանգի պայմաններում»:

Սակայն, թե Ստեփանակերտի օդանավակայանի բացումը եւ թե Սերժ Սարսգյանի հայտարարությունը ենթադրաբար միաշանակ չի ընդունվի միջազգային հանրության կողմից:

Մարտի 29-ին Ադրբեջանում ԱՄՆ դեսպան Մեթյու Բրայզան, անդրադառնալով Ստեփանակերտի օդանավակայանի վերաբացմանը` ասել էր. «Հայաստանը և Ադրբեջանը, մինչև Խանքենդիի օդանավակայանի բացումը, պետք է լուծեն չվերթների անվտանգության հարցերը»:

Բրայզան նաև հավելել է. «Ես ԱՄՆ ղեկավարության դիրքորոշման կողմնակիցն եմ, որը գտնում է, որ կողմերը պետք է հավաքվեն միասին և քննարկեն այդ հարցերը, թե ինչպես պետք է Խանքենդիի օդանավակայանը բացվի: Մենք կարծում ենք, որ մանրամասները պետք է մշակվեն»:

Ընդդիմադիր ՀԱԿ արտաքին կապերի պատասխանատու Վլադիմիր Կարապետյանը «Մեդիալաբի» հետ զրույցում նշել է, որ դատապարտում է Ադրբեջանում ԱՄՆ դեսպան Մեթյու Բրայզայի հայտարարությունը:

«Ես դատապարտում եմ Բրայզայի կողմից Ստեփանակերտը Խանքենդի անվանելու հանգամանքը և այն, որ ԱՄՆ դեսպանը հետքայլ է կատարել նախկինում ԱՄՆ ներկայացուցիչների կողմից հնչեցված այն դիրքորոշմանը, որ քաղաքացիական ինքնաթիռներն ապահովված են համապատասխան անվտանգությամբ: Անընդունելի եմ համարում սպառնալիքի ոճով խոսելը»,- նշեց Կարապետյանը:

Վլադիմիր Կարապետյանի խոսքով` ինքը նաև զարմացած է, որ ՀՀ ԱԳՆ-ն չի անդրադարձել Բրայզայի ապակառուցողական կեցվածքին:

Ինչ վերաբերում է Սերժ Սարգսյանի հայտարարությանը, ապա Կարապետյանի խոսքով` այն պետք է տեղի ունենա նշված ժամկետին, այսինքն` մայիսի 9-ին:

«Սերժ Սարգսյանի կողմից Ստեփանակերտ թռչելը պետք է տեղի ունենա հայկական կողմից ծրագրված ժամանակաշրջանում` մեր նշած օրը»,- հավելեց Կարապետյանը:

Հայկական կողմը, ըստ տեղեկություններ, նախատեսում է դեպի Ստեփանակերտ իրականացվող չվերթների համար գործարկել 50-տեղանոց CRG-200 կանադական օդանավեր:

Տոմսերի գինը, ըստ նախնական տվյալների, պետք է լինի 15-20 հազար դրամի սահմաններում: Սկզբնական շրջանում օրական պետք է իրականացվի մեկ չվերթ: Արդեն իսկ ստեղծվել է համապատասխան ընկերություն` «Արցախավիա», որը պետք է իրականացնի այդ չվերթները:

Քրիստինե Խանումյան

© Medialab.am