Մինչ խոսակցությունները եւ քննարկումները ԱԻՄ նախագահ, նախագահի թեկնածու Պարույր Հայրկիկյանի տարօրինակ պահվածքի շուրջ շարունակվում են, նախկին ոստիկանապետ Ռոբերտ Մելքոնյանը չափածո է «ձոնում»:
Ֆեյսբուք սոցիալական ցանցի իր էջում Ռոբերտ Մելքոնյանի` Հայրիկյանին ուղղված փոքրիկ բանաստեղծությունն արդեն շատերի ուշադրությունն է գրավել: Փորձելով հանգավորել իր խոսքը, նախկին ոստիկանապետը, ով հայտնի է տարբեր թեմաներին շուրջ ֆեյսբուքյան գրառում-մտորումներով, այս անգամ զարմացրել է իր բանաստեղծական ունակություններով:
Բանաստեղծությունն ամբողջությամբ ներկայացնում ենք ստորեւ:
Պարույր Արշավիրի Հայրիկյանը`ՊԱՀ-ը,
Հանելով իր մեջ քողարկված ահը,
Շատ արագ զգաց պահը
Դանկոյի նման ձեռքն առավ ջահը
Փորձեց նստել, հեծնել գահը:
Սակայն, մոռացավ հագնել զրահը,
Թշնամիները ջոկելով պահը
Չափեցին նրա ահը…
Մեր լեգենդար ՊԱՀ-ը
Կրկին արագ զգաց պահը,
Շտապ լքեց ընդիմադիրների ճոճվող նավը,
Մոռանալով ուսի ցավը:
Հիշեցնենք, որ հունվարի 31-ին մահափորձ էր կատարվել նախագահական աթոռի համար պայքարի մեջ մտած Պարույր Հայրիկյանի դեմ, որի հետեւանքով աջ ուսի հատվածում ստացած հրազենային վնասվածքով վերջինս տեղափոխվել էր հիվանդանոց: Վիրավորվելուց հետո Հայրիկյանը սկսել էր խիստ տարօրինակ պահվածք դրսեւորել: Մասնավորապես, Հայրիկյանը բազմիցս որոշեց եւ հետո տարբեր պատրվակներով փոշմանեց դիմել Սահմանադրական դատարան` իր հետ կատարվածի հետեւանքով ՀՀ Սահմանադրության համաձայն ընտրությունները երկշաբաթյա ժամկետով հետաձգելու համար:
Վերջիվերջո փետրվարի 10-ին Պարույր Հայրիկյանը դիմեց Սահմանադրական դատարան, սակայն մեկ օր անց դիմումը հետ վերցրեց` անհասկանալի եւ իրարամերժ բացատրություններով:
© Medialab.am
