«Մենք ունենք շատ բարդ ու պրոբլեմատիկ վիճակ». Վահրամ Բաղդասարյան

«Մենք ունենք շատ բարդ ու պրոբլեմատիկ վիճակ». Վահրամ Բաղդասարյան
«Մենք ունենք շատ բարդ ու պրոբլեմատիկ վիճակ». Վահրամ Բաղդասարյան

Կառավարությունում տեղի ունեցող փոփոխությունների շուրջ «Մեդիալաբը» մի քանի հարց է ուղել Ազգային ժողովի ՀՀԿ խմբակցության ղեկավար Վահրամ Բաղդասարյանին:

-Պարոն Բաղդասարյան, ինչո՞ւ հանկարծ այնպես ստացվեց, որ Հայաստանի տնտեսության վիճակը դարձավ շատ ծանր, ինչի մասին հայտարարում է նորանշանակ վարչապետը:

-Ամեն ինչ համեմատության դաշտում է, եթե մենք 90-ականներից պատմական էքսկուրս կատարենք ու գանք, ես ասեմ, որ եղել է բավական առաջընթաց, ինչը գոհացնող չի եղել: Բնականաբար, հենց դա էր նախորդ կառավարության հրաժարականի պատճառներից մեկը: Եթե այսօրվա ներկայիս վարչապետը հայտարարում է, որ շատ ծանր է վիճակը և ինքը գիտակցելով այդ ծանրությունը՝ աշխատում է որպես վարչապետ, ուրեմն ինքն ունի դեղատոմսը, միջոցներն ու գործիքները, որ լուծի խնդիրները: Ես ողջունում եմ, որ ինքը գիտակցելով տնտեսության ծանր վիճակը, համարձակ քայլ է կատարել: Նրան պետք է բոլորս սատար կանգնենք՝ մեր թիմով, ամբողջ քաղաքական դաշտում, որպեսզի տնտեսության իրավիճակը բարելավվի:

-Բայց բոլորովին վերջերս նախորդ վարչապետ Հովիկ Աբրահամյանը հայտարարում էր, թե տնտեսական աճ է սպասվում Հայաստանում և չէր խոսում ծայրահեղ վատ վիճակի մասին:

-Ես դրա համար եմ ասում, որ ամեն ինչ համեմատության դաշտում է: Կա տնտեսական աճ, բայց դա բավարար չէ: Իսկ նոր վարչապետի գնահատականով՝ վիճակը ծանր է: Այսինքն՝ կան խնդիրներ, որոնք տարբեր մարդկանց կողմից ստանում են տարբեր գնահատականներ: Օրինակ, իմ կարծիքով՝ 90-ականներից հետո տնտեսությունը տեղում չի մնացել, չի դոփել տեղում, փոփոխություններ եղել են:

-Հիմա համամի՞տ եք նոր վարչապետի հետ, որ վիճակը չափազանց ծանր է:

-Ես ասում եմ, որ տնտեսությունում մենք ունենք բավական լուրջ խնդիրներ: Անելանելի չէ, տնտեսության մեջ բավականին լուրջ քայլեր կարելի է կատարել, և դա կախված է ծրագրերից: Այդպիսի ծայրահեղ գնահատականներ ես չեմ տա, բայց մենք ունենք շատ բարդ ու պրոբլեմատիկ վիճակ:

-Բայց կա՞ն մարդիկ, ովքեր մեղավոր են այս ստեղծված իրավիճակի համար, թե՞ անընդհատ պետք է կրկնել, որ արտաքին ազդակների պատճառով է այսօր այս վիճակը ստեղծվել: Ներսում ո՞վ է մեղավոր տնտեսությունը այս վիճակի հասցնելու համար:

-Ես նոր ձևավորվող կառավարությանը հորդորել եմ, որ յուրաքանչյուր ոլորտի պատախանատուի տրվի ինքնուրունություն, պատասխանատվություն, և ձախողման դեպքում նա պետք է գլխով պատասխան տա իր ձախողման համար: Այսինքն՝ միակենտրոն ղեկավարմանը ես միշտ դեմ եմ եղել, պետք է ոլորտներն ունենան ինքնուրույն պատասխանատուներ, դա վերաբերում է նախարարներին, գերատեսչությունների ղեկավարներին: Բնականաբար, այդ հետևությունները կարվեն, եթե եղել են ձախողումներ… Հիմա նոր չէ, որ պատասխանատվության մասին է խոսվում, պատասխանատվություն կրող մարդիկ արդեն եղել են: Վերջին մեկ-երկու տարվա ընթացքում երևի ականտես եք եղել, թե մեծ թվով մարդկանց նկատմամբ չարաշահումների համար ինչ վերաբերմունք է եղել:

-Մանր պաշտոնյաներ են պատժվել, բայց խոշորին գլխից չեք բռնել:

-Ես չգիտեմ՝ ձեզ համար որն է մանր, որը խոշոր, ինձ համար պաշտոնյան պաշտոնյա է: Եվ սպասենք, եթե նորից կլինեն նման հայտնաբերումներ…

-Արդյո՞ք հենց վարչապետերը չեն պատասխանատու տնտեսության ձախողումների համար:

-Վարչապետերը պատասխանատու են, բայց իրենց հնարավարությունների սահմաններում նրանք կատարել են: Եվ եթե իրենք չեն բավարարվել իրենց գործողություններով, ինչպես նախկին վարչապետը, կարող են հրաժարական տալ: Բայց դա չի նշանակում, որ դա միտումնավոր ձախողում է: Կարող է ծրագրային դրույթների հապաղում լինի, դանդաղում, եթե դրա համար դուք մտածում եք, որ պետք է մարդկանց պատժենք… Եղել է տնտեսական աճ, բայց դա չի բավարարել: Մեր արդյունքները պետք է լինեն այնպիսի, որ շոշափելի լինեն հանրության վրա: Եթե պայքարում ենք կոռուպցիայի դեմ, թղթի վրա չպետք է պայքարենք, մենաշնորհի դեմ պայքարելու դեպքում դա նույնպես պետք է զգանք: Այսինքն՝ քայլեր կան, որոնք պետք է կատարել, և միանգամից չպետք է մտածել, որ մարդկանց պետք է գլխատել ու պատասխանատվության ենթարկել, ավելի շատ պետք է մտածենք արդյունքների մասին:

-Երբ նորանշանակ վարչապետը հայտարարում է, որ այսուհետ բիզնես չի խլվելու, դա նշանակո՞ւմ է, որ նախկինում խլվել է:

-Ես խնդրում եմ այդ հարցով իրեն դիմեք: Ես կարծում եմ, որ նա ավելի շատ ի նկատի ուներ, որ ռիսկայնությունը, որ միշտ խոսվում է, որ բավական ռիսկային է բիզնես դնելը, ինքը դա նկատի ուներ: Եվ մենք պետք է, այո, ստեղծենք  բոլոր պայմանները, քննարկենք ռիսկայնությունը, որ մարդիկ ազատ լինեն իրենց ներդրումների հարցում: Եթե լինեն կոնկրետ օրինակներ, ինքը կարող է բացահայտ ասել, և ձեր ասած պատժամիջոցները կկիրառվեն:

-Չե՞ք փորձել պարզել, թե ի՞նչ նկատի ուներ նա, քանի որ հայտարարեց, որ կարծում է՝ նախկինում անհավասար պայմաններ են եղել ու բիզնես է խլվել:

-Ինքը ասում է՝ ասուհետ չենք խլելու, եթե կասի՝ նախկինում խլել են, երբ կասի ում մասին է խոսքը, մենք դրան կանդրադառնանք: Այսուհետ չեն խլելու, ես չգիտեմ՝ նախկինում խլել են, թե ոչ: Դուք հետաքրքրվեք, տեսեք՝ խլել են, թե ոչ:

Էմմա Մանուկյան

MediaLab.am