Տարածաշրջանային հարցերով փորձագետ Արմեն Պետրոսյանը կարծում է, որ վերջին գործողություններով պաղեստինցիները նպատակ ունեն պաղեստինյան հիմնախնդիրը վերադարձնել ակտիվ քաղաքական օրակարգ:
«Չի բացառվում, որ ՀԱՄԱՍ-ի կողմից նման գործողության նախաձեռնումը նպատակ ունի ազդելու այս բանակցությունների վրա, որևէ կերպ թույլ չտալու, որպեսզի այդ գործարքը՝ Իսրայել-Սաուդյան Արաբիա, անտեսի պաղեստինցիների շահերը»,- «Մեդիալաբին» ասում է Պետրոսյանը:
Տեղեկացնենք, որ այսօր լուսադեմին Իսրայելի դեմ աննախադեպ հարձակում է սկսվել՝ Գազայի հատվածի հետ սահմանի ողջ երկայնքով։
Միջազգային լրատվամիջոցները հայտնում են, որ ՀԱՄԱՍ խմբավորման զինյալները, որոնց վերահսկողության տակ է գտնվում Գազան, 20 րոպեի ընթացքում շուրջ 5 հազար հրթիռ են արձակել Իսրայելի տասնյակ քաղաքների, այդ թվում՝ Թել-Ավիվի և Երուսաղեմի ուղղությամբ: Հրթիռակոծությունից հետո զինյալներն անցել են ցամաքային հարձակման:
Հաղորդվում է տասնյակ զոհերի եւ բազմաթիվ վիրավորների մասին:
«Այստեղ մի կարևոր հանգամանք կա. ՀԱՄԱՍ-ի ու Իսրայելի միջև հակամարտությունը նոր չէ, պարբերական բնույթ է կրում, գրեթե ամեն երկու տարին մեկ այսպիսի լուրջ բախում տեղի է ունենում: Վերջին լարվածությունը ես կապում եմ առավելապես Սաուդյան Արաբիա-Իսրայել հարաբերությունների կարգավորման գործընթացի հետ՝ ԱՄՆ-ի ակտիվ միջնորդությամբ, որում կարևոր տեղ ունի Պաղեստինի կարգավիճակի հարցը»,-նշում է Պետրոսյանը՝ նշելով, որ դժվար է կանխատեսումներ անել լարվածության ընթացքի մասին:
«Ամեն ինչ կապված է Սաուդյան Արաբիա-Իսրայել գործընթացի հետ, որովհետև Պաղեստինի հարցն անտեսված էր, ու այս գործողությամբ պաղեստինցիները նպատակ ունեն, որ պաղեստինյան հիմնախնդիրը վերադառնա ակտիվ քաղաքական օրակարգ»,- եզրափակում է Պետրոսյանը:
Քրիստինե Աղաբեկյան
MediaLab.am