ԱՄՆ պետքարտուղարի հայտարարությունը լիակատար բարոյական աջակցություն էր հայկական կողմին։ «Մեդիալաբի» հետ զրույցում նման դիտարկում է անում քաղաքագետ Ռուբեն Մեհրաբյանը։
«Իհարկե սա տեղի ունեցավ պատերազմի գրեթե 20-րդ օրը, բայց, այնուամենայնիվ, սա հստակ մեսիջ էր հայկական կողմին, որ Միացյալ Նահանգները բարոյական լիակատար աջակցություն է հայտնում հայերին, սակայն պետք է ասենք, որ ոչ ավելին»,- ասում է Մեհրաբյանը։
Հիշեցնենք, որ ԱՄՆ պետքարտուղար Մայք Պոմպեոն իր հարցազրույցում անդրադառնալով Արցախի հիմնախնդրին, ասել է. «Այդ հակամարտության լուծումը պետք է իրականացվի բանակցությունների և խաղաղ քննարկումների, ոչ թե զինված բախումների միջոցով և, իհարկե, ոչ այն երրորդ երկրների հետ, որոնք գալիս են մարտական ուժ տրամադրելու մի իրավիճակում, որն արդեն իսկ պայթյունավտանգ է:
Մենք հուսով ենք, որ հայերը կկարողանան պաշտպանվել այն բանից, ինչ անում են ադրբեջանցիները, և որ բոլորը, մինչ դրա տեղի ունենալը, հրադադարի ռեժիմը ճիշտ կպահեն, ապա կնստեն սեղանի շուրջ և կփորձեն կարգավորել այս: Այն, ինչ իսկապես պատմական և բարդ խնդիր է»։
ԱՄՆ պետքարտուղարը նաև հստակ նշել էր, որ թուրքերը միջամտել և ռեսուրսներ են տրամադրել Ադրբեջանին՝ մեծացնելով ռիսկն ու կրակը, որ տեղի է ունենում Արցախում։
Ռուբեն Մեհրաբյանի խոսքով՝ այս հայտարարությունը տեղ է բացում քաղաքական աջակցության համար, հատկապես եթե հաշվի ենք առնում ամերիկյան կողմի նախորդ հայտարարությունները՝ Թուրքիայի միջամտության և ներգրավվածության անընդունելիության վերաբերյալ։
Հարցին, թե ամերիկյան կողմի հայտարարություններին կարո՞ղ են հաջորդել հակամարտության խաղաղ լուծման համար հստակ քայլեր, քաղաքագետը պատասխանում է. «Թե ինչ կլինի, հիմա դժվար է ասել։ Բայց, համենայնդեպս, պետքարտուղարի ասածը սովորական մասնավոր անձի ասած չէ, սա դիրքորոշում է։ Եվ սա տեղ է բացում նման հնարավորության համար, որը թե որքանով հնարավորություն կդառնա, որքանով՝ ոչ, կապրենք, կտեսնենք»։
Ռոզա Հովհաննիսյան
MediaLab.am
