Չնայած հանրային ընդվզմանը եւ Հանրային ծառայությունները կարգավորող հանձնաժողովի դիմաց տեղի ունեցող բողոքի ակցիային, այսօրվա նիստում սպառողներին մատակարարվող մեկ կՎտ ժամ էլեկտրաէներգիայի սակագինը թանկացավ 3.85 դրամով: Այս մասին տեղեկացնում է «Լրագիրը»: Ըստ աղբյուրի, հանձնաժողովի անդամներն այս որոշմանը միաձայն կողմ քվեարկեցին:
Սա նշանակում է, որ օգոստոսի մեկից սպառողների համար էլեկտրաէներգիան կթանկանա 10 տոկոսով` 3.85 դրամով՝ կազմելով 41.85 դրամ:
Հիշեցնենք, որ սակագնի թանկացման նախաձեռնությամբ հանդես է եկել Հանրային ծառայությունները կարգավորող հանձնաժողովը՝ հաշվի առնելով էներգետիկ համակարգի 11 ընկերություններից ստացված հայտերը:
Ըստ պաշտոնական հաղորդագրության, սակագնի վերանայման պատճառն այն է, որ ոլորտում ներկայումս առաջացել է 17.9 մլրդ դրամ ֆինանսական ճեղք, որն էլ ծածկելու համար սակագինը բարձրացվել է: Ֆինանսական ճեղքվածք ունեն ինչպես էլեկտրաէներգիա արտադրող ընկերությունները, այդ թվում՝ Հայկական ատոմակայանը, այնպես էլ ռուսական ՌԱՕ ԵԷՍ ընկերությունը, որը Հայկական էլեկտրական ցանցեր ընկերության կառավարիչն է:
Հանրային ծառայությունները համակարգող հանձնաժողովի նախագահ Ռոբերտ Նազարյանն ավելի վաղ ասել էր, որ ֆինանսական խնդիրների առաջացման պատճառները երկուսն են. ատոմակայանը նախորդ տարի նախատեսվածից երկար ժամանակով է կանգնեցվել վերալիցքավորման, ինչի հետևանքով էլեկտրաէներգիայի բացը լրացվել է ՋԷԿ-երի արտադրած էլեկտրաէներգիայով, որն ավելի թանկ է: Երկրորդ պատճառն, ըստ նրա, այն է, որ վերջին տարիները սակավաջուր են, ՀԷԿ-երը էլեկտրաէներգիա քիչ են արտադրում:
Նազարյանը նշել էր, որ եթե էլեկտրաէներգիայի սակագինը չբարձրանա, Ռոբերտ Նազարյանի խոսքով, ՀԷՑ-ի ֆինանսական խնդիրները չեն լուծվի, Երևան ՋԷԿ-ը վարկային պարտավորությունների մարման խնդիրների առաջ կկանգի, համակարգը կպարալիզացվի:
Էլեկտրաէներգիայի սակագնի բարձրացման նախաձեռնությունը բողոքի ալիք է բարձրացրել:
«Դեմ եմ էլեկտրաէներգիայի թանկացմանը» նախաձեռնությունն բողոքի ակցիաներով պայքարում է թանկացման դեմ: Այսօր եւս նախաձեռնության անդամները փողոց էին դուրս եկել` բողոքի ձայնը բարձրացնելու:
«Ամեն մի թանկացում ազդում է ժողովրդի տրամադրությունների վրա: Մենք ունենք հասարակության 10-12 տոկոս, որի համար նշանակություն չունի թանկացումը, կապ չունի՝ լեքսուսն ինչ արժե, գազն ինչ արժե, բայց մյուսների վրա դա էական ազդեցություն կունենա»,- անդարդառնալով խնդրին «Մեդիալաբին» ասել է «Հայաստանի սպառողների միությունը», որի նախագահ Արմեն Պողոսյանը:
Նրա խոսքով, եթե թանկացումները դիտարկենք երկարատև ժամանակահատվածում, օրինակ, երեք տարվա կտրվածքով, ապա կտեսնենք, որ հայ ժողովուրդը հայտնվել է անելանելի իրավիճակում: Սպառողների միությունը հաշվարկել է՝ սնունդն ու հանրային ծառայություններն այսօր Հայաստանում նվազագույն սպառողական զաբյուղում մոտ 90 տոկոս են կազմում:
© Medialab.am
