Տուրիզմի հայկական ֆեդերացիայի նախագահ Մեխակ Ապրեսյանը էկոնոմիկայի նախարարի պաշտոնակատար Վահան Քերոբյանի սպասումները՝ Հայաստանի զբոսաշրջության ոլորտում 319 տոկոս աճի մասին, միանգամայն իրատեսական է համարում:
Հիշեցնենք՝ օրեր առաջ լրագրողների հետ ճեպազրույցում Քերոբյանը հայտարարել էր, որ այս տարի, նախորդ տարվա համեմատ, տուրիզմի ոլորտում 319%-ով աճ կգրանցվի, այսինքն՝ 2021-ին նախարարը սպասում է 1,2 մլն զբոսաշրջիկ:
Ըստ Ապրեսյանի՝ այդ թիվը շատ իրատեսական է, ուղղակի պետք է աշխատել, ձեռնարկել անհրաժեշտ միջոցառումներ, այդ թվում՝ էկոնոմիկայի նախարարության կողմից:
Նրա խոսքով՝ 2019 թվականին Հայաստանն ունեցել է 1.9 մլն զբոսաշրջիկ, և այնպես չէ, որ 1,2 մլն-ին սպասելը ֆանտաստիկայի ժանրից է:
«Մասնավոր հատվածը, պետությունը աշխատանքներ են տանում, որ դեպի Հայաստան այցելություններ լինեն: Որոշակի թվով, իհարկե, հիմա կան, բայց դա չէ իհարկե ցանկալի արդյունքը: Հույսներս չենք կտրում և ուզում ենք ամեն ինչ անել, որ իրավիճակը վերականգնվի: Պետք է շատ աշխատել, և միայն այդ դեպքում ֆանտաստիկան իրական կթվա»,- «Մեդիալաբին» ասում է Ապրեսյանը:
Հնարավորություններ տեսնո՞ւմ է, որ կվերականգնվի զբոսաշրջային երբեմնի աշխուժությունը հարցին Ապրեսյանը պատասխանում է ժպտալով. «Ասում են՝ հույսը լույսից հետո է մարում: Այո՛, շանսն էլ, հույսն էլ տեսնում ենք, պետք է ուղղակի աշխատել, որ այդ շանսը չկորցնենք»:
Մասնավորապես, Մեխակ Ապրեսյանն ասում է, որ մարքեթինգային լայնածավալ քաղաքականություն պետք է իրականացնել: Մյուս խնդիրը, ըստ Ապրեսյանի, այն է, որ Հայաստանը թեպետ կորոնավիրուսային հիվանդության տարածվածության առումով բարվոք վիճակում է, բայց քարտեզներում ներկայացվում է որպես կարմիր գոտի, այսինքն՝ ճամփորդության համար ոչ ցանկալի երկիր:
«Դա էական բացասական ազդեցություն է գործում, և պատկան մարմինները, հատկապես՝ առողջապահության, արտաքին գործերի նախարարությունները այդ ուղղությամբ աշխատանքներ ունեն կատարելու: Պետք է հանել Հայաստանը այդ ցուցակներից»,- նշում է ֆեդերացիայի նախագահը:
Հայաստան ժամանող զբոսաշրջիկների համար այս օրերին, ըստ Ապրեսյանի, մեկ այլ բարդություն է լրացուցիչ ՊՇՌ թեստ անելու մասին պահանջը:
«Այսօր աշխարհի շատ երկրներում սկսել են պատվաստումներ իրականացնել, շատ շատերը արդեն պատվաստվել են, և, անկախ նրանից, Հայաստան այցելող զբոսաշրջիկը պատվաստվել է, թե ոչ, մենք նրանից բացասական թեստի արդյունք ենք պահանջում: Դա մեծ խոչընդոտ է և, բացի գումարից, նաև տհաճություն կարող է պատճառել այցելուին»,- նկատում է նա՝ անհրաժեշտ համարելով գոնե պատվաստվածների համար վերացնել լրացուցիչ թեստավորման պահանջը:
Մեխակ Ապրեսյանն ասում է՝ Զբոսաշրջության կոմիտեի ու ֆեդերացիայի անդամ զբոսաշրջային ընկերությունների հետ միասին կազմում են ծրագիր դեպի Արցախ այցելությունները վերականգնելու համար:
«Արցախում հանդիպումներ ենք ունեցել ու քննարկել բոլոր հնարավորությունները: Պետք է շատ ակտիվ աշխատանքներ տանենք ու սկսել ենք արդեն: Դրանով մենք պետք է ցույց տանք մեր հանրությանը, որ Արցախ կարելի է ու անհրաժեշտ է այցելել: Որևէ մեկն իրավունք չունի սահմանափակելու Արցախում զբոսաշրջություն լինելու հնարավորությունը: Արցախում պետք է լինի զբոսաշրջություն»,- ընդգծում է մասնագետը:
Հասմիկ Համբարձումյան
MediaLab.am
