Սեպտեմբերի 9-ին կայանալիք Տեղական ինքնակառավարման մարմինների (ՏԻՄ) ընտրություններում շատ հետաքրքիր իրավիճակ է ստեղծվել: Մասնավորապես գյուղական համայնքներում բավականին ուշագրավ առաջդրումներ կան. աղջիկն ընդդեմ գյուղապետ հոր, կիննը ընդեմ գյուղապետ ամուսնու եւ այլն:
Սյունիքի մարզի Մուցք գյուղում գյուղապետի պաշտոնի համար իրար դեմ են առաջադրվել ամուսիններ՝ գործող գյուղապետ Դրաստամատ Նավասարդյանը եւ նրա կինը` Հայկանդուխտ Կիրակոսյանը:
36 տարվա մանկավարժ տիկին Կիրակոսյանը հավատացնում է, որ առաջադրվել է իր ցանկությամբ:
«Ես միշտ ուզել եմ գյուղապետի թեկնածություն դնել, այս պարագայում իմ ամուսինն է գյուղապետը, իր դեմ եմ դրել: Տեսնենք ու՞մ բախտը կբերի, ո՞վ կանցնի ընտրություններում»,- «Մեդիալաբին» ասում է Կիրակոսյանը եւ հավելում, որ սա ոչ մի կերպ չի խոչընդոտում ընտանեկան հարաբերություններին:
«Վեճ, կռիվ-մռիվ չկա մեր մեջ»,-ասում է տիկին գյուղապետի թեկնածուն:
62-ամյա ամուսինը՝ գործող գյուղապետ Դրաստամատ Նավասարդյանը նույնպես նշում է, որ ընտրությունների պատճառով ընտանիքում հարցեր չեն առաջանում.
«Ինքը իր համար է դրել, ես իմ, դա իր իրավունք է թեկնածություն դնելու, ուզեց, դրեց: Ես ավելի ուրախ կլինեմ, եթե ինքը անցնի, բայց տեսնենք ինչպե՞ս կլինի արդյունքները»,-ասում է նա:
Հիշեցնենք, որ Մուցքում առաջադրված է միայն երկու ամուսինների թեկնածությունը: Նմանօրինակ «ընտանեկան առաջադրումները» գալիք համայնքային ընտրություններում հանդիպում են նաեւ այլ մարզերի գյուղերում:
Սեպտեմբերի 23-ին Տավուշի մարզի Աճարկուտ համայնքի Տեղական ինքնակառավարման մարմինների ընտրություններում ղեկավարի թեկնածություն են դրել 1991թ.-ից Աճարկուտ համայնքի ղեկավարող Ռաֆիկ Օհանյանը եւ նրա դուստր Լիանա Օհանյանը:
Գյուղապետը նշել է, որ դստեր առաջադրումը պայմանավորված է Ընտրական օրենսգրքի պահանջով, որ համայնքի ղեկավարի ընտրությունը կայացած է համարվում, երկուսից ավելի թեկնածուների առաջադրումների պարագայում:
«Դե օրենքը պահանջում ա էլի, դե ուրիշ մեկը չկար էլի, ասեցին՝ կա, կա, էկել ա, վերջին օրերն ա, չկա»,- ըստ tert.am-ի ասել է նա:
Հիշեցնենք, որ Ընտրական օրենսգրքի 143 հոդվածի 6-րդ կետի 2-րդ մասի համաձայն՝ համայնքի ղեկավարի ընտրությունը համարվում է չկայացած, եթե սույն օրենսգրքով թեկնածուների գրանցման համար սահմանված ժամկետում եւ կարգով թեկնածու չի գրանցվել, կամ նույն ժամկետում գրանցված թեկնածուների թիվը պակաս է 2-ից:
Սակայն, «Մեդիալաբի» հետ զրույցում Աճարկուտի ղեկավարը նշել է, որ աղջկա առաջադրվելու պատճառն ամենեւին էլ օրենքի պահանջներից չի բխում: Նա ասել է, որ առաջադրվում է գյուղապետի երրորդ թեկնածուն, իսկ իր 33-ամյա աղջկա առաջադրումը ոչ մի կապ չունի օրենսգրքի պահանջի հետ:
«Ինքը իրա ցանկությամբ ա դրել: Մանկավարժ ա, 6-7 տարի դպրոցում աշխատել ա, հիմա դուրս ա եկել դպրոցից: Իմ համար նշանակություն էլ չունի ով կանցնի, էս գյուղը Հայաստանի ամենափոքր գյուղերից ա…130 ընտրող ունեցող, անտառի մեջ գտնվող, հեչ հողագործություն էլ չունեցող գյուղա»,-«Մեդիալաբին» ասում է Օհանյանը` նշելով, որ ամենեւին չի հասկանում հայր ու աղջիկ առաջադրման շուրջ ստեղծված հետաքրքրությունը:
«Ինչի են էդքան զարմացած, չեմ հասկանում»,-ասում է նա:
Լիլիթ Առաքելյան
© Medialab.am
