«Թուրքից վերան ազգ ենք». մինչ «Գարեգին Նժդեհ» ֆիլմի գլխավոր դերակատարը վրդովվում է, մասնագետները նշում են` «հումորն անառիթ չէ»

«Թուրքից վերան ազգ ենք». մինչ «Գարեգին Նժդեհ» ֆիլմի գլխավոր դերակատարը վրդովվում է, մասնագետները նշում են` «հումորն անառիթ չէ»
«Թուրքից վերան ազգ ենք». մինչ «Գարեգին Նժդեհ» ֆիլմի գլխավոր դերակատարը վրդովվում է, մասնագետները նշում են` «հումորն անառիթ չէ»
Հեղինակ MediaLab

Ռեժիսոր Հրաչ Քեշիշյանի «Գարեգին Նժդեհ» ֆիլմը թեև դեռևս էկրան չի բարձրացել, սական կինոնկարի պաշտոնական թրեյլերը, որը մեծ ակտիվությամբ գովազդվում էր հեռուստատեսությամբ, արդեն իսկ բուռն քննարկումների տեղիք է տվել:
Թեև մի քանի օր է, ինչ շրջանառության մեջ է դրվել երկրորդ պաշտոնական թրեյլերը, որում բացակայում են թևավոր խոսքերը, սակայն քննարկումներն ու խոսակցությունները, միևնույն է, չեն դադարում:
Խոսքն այս դեպքում վերաբերում է, մասնավորապես, Նժդեհի կերպարը մարմնավորած առաջին թրեյլերում Արտաշես Ալեքսանյանի` «Յա Գարեգին Նժդեհ» խոսքին, որը շահարկումների և քննարկումների, ինչպես նաև «Ֆեյսբուքում» հատուկ խումբ ստեղծելու առիթ է հանդիսացել, ուր տարբեր հերոսներ տարբեր իրավիճակներում արտասանում են նույն արտահայտությունը:

«Առաջին անգամ եմ տեսնում աշխարհում, որ մի բանը չտեսած` ուզում են քննադատել»,- «Մեդիալաբին» ասում է PR մասնագետ Կարեն Քոչարյանը`հակադարձելով այն կարծիքին, թե չափից ավելի գովազդը հանգեցրել է հակագովազդի:

Ֆիլմում Գարեգին Նժդեհին մարմնավորած գլխավոր դերակատար Արտաշես Ալեքսանյանը, ստեղծված իրավիճակից վրդովված և զարմացած, հարց է ուղղում՝ ինչպե՞ս կարելի է առանց ֆիլմը դիտելու գովազդի միջոցով դատողություններ անել:

«Ես մի բան կարող եմ ասել՝ թուրք ազերիներն իրենց մարդասպանին դարձնում են հերոս, իսկ մերոնք իրենց հերոսին, իրենց մարգարեին դարձնում են ծաղրի առարկա: Թուրքից վերան ազգ ենք մենք»,- «Մեդիալաբի» հետ զրույցում ասում է դերասանը:

Ալեքսանյանը կարծում է, որ ֆիլմը սխալ չի գովազդվել, իսկ այն ծաղրողները «կյանքում հաջողության չհասած մարդիկ են»: Նա ֆիլմի հանդեպ վատ տրամադրված անձանց հասցեին ասում է.

«Ես մեծ հաճույքով կլսեմ, թե այդ ասողներն ի´նչ են նկարում: Թող նկարեն, գործն անեն, գան խոսենք»,- ավելացրեց դերասանը:

Արտաշես Ալեքսանյանի խոսքով՝ 70 և ավելի տարիներ քարկոծվել է մարգարեն, չի թույլատրվել, որ ձայն բարձրացվի, որ խոսք գնա Գարեգին Նժդեհի մասին:

«Էսօր, երբ ֆիլմ է նկարվել, թափթփուկներն ուզում են քարկոծել Գարեգին Նժդեհին: Թեկուզ աշխարհի ամենավատ ֆիլմը լինի, դու, հա´յ մարդ, դու պարտավոր ես քո մարգարեին, դու պարտավոր ես քո արվեստը, մշակույթը բարձր պահել: Մարդասպանին հերոսի կոչում են տալիս, իսկ դուք էսօրվա օրով, այն դեպքում, որ տարիներ շարունակ չի թույլատրվել Նժդեհի մասին խոսել կամ նկարել, վերցնում եք ու սրբապղծությամբ եք զբաղվում»,- վրդովված նշեց դերասանը:

Նժդեհի դերակատարը ֆիլմը հաջողված է համարում: Նա ցանկանում է, որ մեր մյուս հերոսների մասին նույնպես այդ որակի ֆիլմեր նկարահանվեն:

Տեղեկացնենք, որ «Գարեգին Նժդեհ» ֆիլմարտադրողն Panarmenian films ընկերությունն է: Ֆիլմում նկարահանվել են Արտաշես Ալեքսանյանը, Խորեն Լևոնյանը, Շանթ Հովհաննիսյանը, Միխայիլ Եֆրեմովը, Չուլպան Խամատովան, Նազենի Հովհաննիսյանը և այլք: Ֆիլմի պաշտոնական թրեյլերի նկարագրության մեջ նշվում է, որ «Գարեգին Նժդեհ» գեղարվեստական կինոնկարը, պատմում է հայազգի պանծալի զավակ, սպարապետ Գարեգին Նժդեհի անցած ռազմական փառապանծ ու դժվարին ուղու մասին՝ ընդգրկելով զորավարի կյանքի հայտնի, ինչպես նաև ոչ այնքան լուսաբանված դրվագները:

Ֆիլմի պրեմիերան նախատեսվում է հունվարի 28-ին`«Մոսկվա» կինոթատրոնում:

«Մեդիալաբը» փորձեց ոլորտի մասնագետներից պարզել՝ ո՞րն է պատճառը, որ ֆիլմը դեռ չդիտած՝ շատերի մեջ արդեն իսկ բացասական վերաբերմունք է առաջացել:

Ռեժիսոր, դերասան Աշոտ Ադամյանը «Մեդիալաբին» ասաց, որ խնդիրը խորքային արմատներ ունի:

«Մշակութային ցածր մակարդակ, արվեստի նկատմամբ գրեթե զրոյական վերաբերմունք, մեդիաներով քարոզվող բացահայտ խոտան, պրոֆեսիոնալ մասնագետների միկրոներգրավվածություն և շատ այլ բարդ խնդիրներ` այս ամենը կարող է հունից հանել մարդկանց, որոնց անդադար սնում են ցածրորակ արտադրանքով»,- ասաց Ադամյանը:

Ինչ վերաբերում է ֆիլմին, ապա դերասանը նշեց, որ չի ուզում խոսել այդ մասին, քանի որ այն չի դիտել:

«Ազնվորեն խոստովանեմ՝ չեմ էլ պատրաստվում նայել: Միայն ասեմ, որ այն մեքենան, որը ձեռնամուխ է եղել Գարեգին Նժդեհի՝ լուրջ հայորդու մասին ֆիլմի նկարահանմանը, ի սկզբանե իրար է խառնել հակադիր բաներ՝ «շոու-բիզնես» մեքենայի պարտադրանքի ու խրախճանքի մեխանիզմը և ազգային արժեքը»,- ընդգծեց Աշոտ Ադամյանը:

Դերասան Ազատ Գասպարյանը «Մեդիալաբի» հետ զրույցում ևս նշեց, որ ֆիլմը դեռ չդիտած` չի ցանկանում մեկնաբանություն անել:

Այնուամենայնիվ նա հասարակությանը կոչ արեց՝ Գարեգին Նժդեհի անունը լսելիս պետք է մի քիչ զուսպ լինենք, հպարտ լինենք:

«Եթե աշխատանք է տարված, նայենք` նոր խոսենք: Որքան էլ այն չլինի ինչ որ մեր սրտով էր, պիտի մի քիչ զուսպ լինենք, ներողամիտ լինենք: Առաջին գործն է, որ արվում է Գարեգին Նժդեհի մասին, հնարավոր է` թույլ լինի: Հետո ուժեղ կլինի, ոչինչ: Ռուսներն իրենց հերոսների մասին մի քանի ֆիլմեր փչացնելուց հետո նոր ստացան այն, ինչ պետք էր: Մեր առաջին փորձն է, ես չգիտեմ՝ ինչ է, կուզեմ, որ լավ լինի, բայց կանխակալ այդպիսի կարծիք հայտնելը վայել չէ մեզ, ճիշտ չէ»,- ասաց Ազատ Գասպարյանը:

Կինոռեժիսոր Էդգար Բաղդասարյանը խորհուրդ է տալիս՝ մենք պետք է սովորենք ընդհանրապես ծիծաղել մեզ վրա և հումորին նորմալ վերաբերվել: Ըստ նրա՝ հումորն էլ շատ առողջարար է, առավել ևս` պաթոսի հանդեպ: Իսկ ֆիլմի շուրջ ստեղծված այս իրավիճակը նա հումորային է համարում:

«Այդ հումորն անառիթ չէ իհարկե, պաթոսով է դա պայմանավորված, հումորը շատ լավ դեղամիջոց է պաթոսի դեմ: Ավելորդ պաթոսը կարող է բերել նման պահերի, որ լինի ծիծաղելի, մեկը` քիչ ծիծաղելի, մյուսը` շատ ծիծաղելի, մեկը` հաջող, մյուսը` անհաջող: Չեմ կարծում, թե դա ֆիլմի դեմ արված ինչ-որ բան է: Ընդամենը պաթոսային այդ կերպարի դեմ է, որն էլ ընդհանրապես Նժդեհի հետ, ինձ թվում է՝ կապ չունի: Ամենազավեշտալին դա է, որ Նժդեհի հետ են կապում: Ես ներողություն եմ խնդրում Նժդեհից, դա ընդհանրապես ծիծաղելի է»,- ասաց Էդգար Բաղդասարյանը:

Ինչ վերաբերում է ֆիլմին, կինոռեժիսորը նշեց.

«Ֆիլմի մասին ամեն ինչ պարզ է: Ես հասկացել եմ, որ դա Հրաչ Քեշիշյան է, ի՞նչ պիտի հասկանամ, միանգամից պարզ է արդեն», -ասաց նա:

Ֆիլմի ռեժիսոր Հրաչ Քեշիշյանը խոստացավ ավելի ուշ արձագանքել, սակայն այնուամենայնիվ խուսափեց «Մեդիալաբի» հարցերին պատասխանելուց:

© Medialab.am