Ամենայն հավանականությամբ այս տարի արդեն Ստեփանակերտի օդանավակայանից կիրականացվի առաջին թռիչքը, որը կիրականացվի դեպի Երեւան: Այդ մասին «Մեդիալաբի» հետ զրույցում տեղեկացրեց ԼՂՀ կառավարությանն առընթեր Քաղաքացիական ավիացիայի վարչության պետ Դմիտրի Ադբաշյանը:
«Ներկայում լայնածավալ աշխատանքներ են իրականացվում թռիչքուղու վրա»,- նշեց Ադբաշյանը: Վերջինս տեղեկացրեց, որ այս պահին լայնացվում է թռիչքուղու լայնությունը. այն կառուցվել է 37 մետր լայնությամբ, այժմ այն դարձնում են 45 մետր` ապահովելու համար թռիչքների անվտանգությունը:
Դմիտրի Ադբաշյանի խոսքով, դա արվում է այն պատճառով, որ թռչելու եւ վայրէջքի ժամանակ ինքնաթիռը կարող է մի քանի մետր աջ կամ ձախ թեքվել, ուստի այժմ թռիչքուղին լիովին փորձում են համապատասխանեցնել միջազգային նորմատիվներին: Թե կոնկրետ երբ կավարտվեն թռիչքուղու հետ կապված աշխատանքները, Ադբաշյանը դժվարացավ պատասխանել` նշելով, որ դա կապված է մի քանի գործոններից. եղանակային պայմաններ, ասֆալտապատման համար անհրաժեշտ միջոցներ եւ այլն:
Ադբաշյանը տեղեկացրեց, որ համենայնդեպս, շինարարությունն իրականացնողները իրեն խոստացել են մինչեւ սեպտեմբերի կեսերը ավարտին հասցնել թռիչքուղու հետ կապված աշխատանքները: Բացի թռիչքուղուց այժմ տեղադրման փուլում են ռադիոնավիագացիոն համակարգերը: Ըստ նրա, այս պահին մնացել է միայն բազմադիրքային ռադիոլակացիոն համակարգի տեղադրումը, որը շուտով պետք է հասնի Ստեփանակերտ:
«Սեպտեմբերին ավարտին կհասցվի օդանավակայանի այսպես կոչված ցամաքային բազան, ինչից հետո կմնա միայն օդանավերի պարկի խնդիրը»,- նշեց Ադբաշյանը:
Ադբաշյանը տեղեկացրեց, որ մինչ այդ պահը իրենք շարունակում են մնալ այն կարծիքին, որ Ստեփանակերտի օդանավակայանի համար լավագույն տարբերակը կանադական 50 տեղանոց CRG 200 օդանավաներն են: Ադբաշյանը, սակայն, չասաց, արդո՞ք իրենք արդեն տվել են այդ օդանավերի պատվերը. նա դա համարեց կոմերցիոն գաղտնիք:
Քաղաքացիական ավիացիայի վարչության պետը տեղեկացրեց նաեւ, որ 230 հեկտար տաչածք զբաղեցնող օդանավակայանը, արդեն իսկ համագործակցության առաջարկներ է ստացել մի քանի երկրներում գործող ուղեւորափոխադրող ընկերություններից եւ տուրիստական կազմակերպություններից:
Թե ո՞ր երկրներից են այդ ընկերությունները, Ադրբաշյանը կրկին չմանրամասնեց, սակայն հավելեց, որ այս տարի արդեն կարելի է հաստատակամորեն ասել, որ տեղի կունենա առաջին թռիչքը: Ադբաշյանի խոսքով, առաջին օդանավը, (որի տոմսի գինը, ըստ նախնական հաշվարկների, կլինի 15-20 հազար դրամի սահմաններում), Ստեփանակերտից կուղեւորվի Երեւան:
Հիշեցնենք, որ մարտի 31-ին Հայաստանում գտնվող Շվեցարիայի Համադաշնության նախագահ Միշել Կալմի-Ռեյի հետ համատեղ ասուլիսում` փորձելով ցրել դեպի Ստեփանակերտ թռիչքների անվտանգության հետ կապված հարցերը` Սերժ Սարգսյանը հայտարարել էր, թե Երեւան-Ստեփանակերտ չվերթի առաջին ուղեւորն ինքն է լինելու։
Այս հայտարարությունն արվել էր, ի պատասխան ադրբեջանական կողմի` Ստեփանակերտի օդանավերը ոչնչացնելու վերաբերյալ հնչող սպառնալիքների:
Հիշեցնենք նաեւ, որ սկզբնական շրջանում նախատեսվում էր Ստեփանակերտի օդանավակայանը բացել անցյալ տարվա հոկտեմբերին:
Անցյալ տարվա սկզբին` օդանավակայանի եւ ուղեւորային համալիրի կառուցման կապալառու «Հորիզոն-95» շինարարական ընկերության տնօրեն Գագիկ Գալստյանը «Արմենպրեսին» տեղեկացրել էր, որ երկարատեւ դադարից հետո Ղարաբաղում առաջին օդանավն արդեն կարող է վայրէջք կատարել 2010 թվականի հոկտեմբերին:
Հոկտեմբերին, սակայն, օդանավակայանը չբացվեց, եւ դրանից հետո սկսեց շրջանառվել հենց մայիսի 9-ը: Մասնավորապես, «Ազգ» օրաթերթն այս տարվա սկզբին, հղում կատարելով ԼՂՀ կառավարությանն առընթեր քաղաքացիական ավիացիայի վարչությանը, նշել էր, որ օդանավակայանը շահագործման կհանձնվի հենց մայիսի 9-ին: ԼՂՀ իշխանությունները, սակայն, հետո հերքեցին այդ տեղեկությունը:
«Ոչ մեկը օր չէր նշել, եւ ես չգիտեմ, թե որտեղի՞ց է շրջանառվել այդ օրը: Բացումը նախատեսված է եղել մայիսին, բայց ոչ թե հենց մայիսի 9-ին: Մեզ համար օրը կամ ամիսը կարեւոր չէ, մեզ համար կարեւոր է, որ օդանավակայանը լինի ապահով եւ համապատասխան չափանիշներով կառուցված»,- ավելի վաղ «Մեդիալաբին» ասել էր ԼՂՀ նախագահի մամլո խոսնակ Դավիթ Բաբայանը:
Քրիստինե Խանումյան
© Medialab.am
