Թեև Հայաստանում սելեկտիվ աբորտների շուրջ ստեղծված մտահոգիչ իրավիճակը մեղմելու համար կառավարությունը փորձում է իրավիճակը վերահսկողության տակ առնել` օրենսդրական փոփոխությունների միջոցով առաջարկելով արգելել տեղեկություններ տրամադրել պտղի սեռի վերաբերյալ, այնուամենայնիվ իրավիճակը մեծ հաշվով չի փոխվում:
Դեկտեմբերի 6-ին Երեւանի կենտրոնում`Հյուսիսային պողոտայում, «Ընդդեմ կանանց նկատմամբ բռնության կոալիցիայի» կազմակերպած «Հայաստանի չծնված աղջիկները» անվանումով ազդեցիկ ակցիան կրկին անգամ խնդիրը լսելի դարձնելու նպատակ ուներ:
«Խնդրի մասին վերջի մի քանի տարում խոսվում է, նույնիսկ ուսումնասիրություններ կան, բայց հասարակությունը լուրջ չի նայում այս հարցին, այդ իսկ պատճառով կոալիցիան որոշեց խնդիրն այս մոտեցամամբ ավելի տեսանելի դարձնել,-«Մեդիալաբին» ասում է կոալիցիայի անդամ, «Հանրային տեղեկատվություն եւ գիտելիքի կարիք» (PINK Armenia) ՀԿ նախագահ Մամիկոն Հովսեփյանը:
Թեև ոչ մեկի համար էլ գաղտնիք չէր երկրում ընտրովի աբորտների առկայությունը, այնուամենայնիվ, 2011-ին ՄԱԿ-ի Բնակչության հիմնադրամի նախաձեռնած հետազոտությունն ավելի ակնառու ցույց տվեց, որ հայաստանյան ընտանիքների մի մասն աբորտի միջոցով թույլ չի տալիս աղջիկ երեխաներին լույս աշխարհ գալու՝ նախընտրելով տղա երեխա ունենալ:
Այս ամենի հետևանքով 1990-ականներից ի վեր Հայաստանում շեղվել է նորածինների հարաբերակցությունը՝ 100 աղջկա դիմաց կազմելով 114 տղա (2012) այն դեպքում, երբ նորմայի դեպքում պետք է 102-106 լիներ:
«Իրականացված հետազոտությունը հաստատեց, որ նորածինների սեռերի շեղված հարաբերակցությունը նախածննդյան փուլում երեխայի սեռի ընտրության հետևանք է,-նշված է «Նորածինների սեռերի անհամամասնությունը Հայաստանում» ուսումնասիրության մեջ, և այն ցույց տվեց, որ Հայաստանը տարեկան կորցնում է շուրջ 1400 աղջիկ, ինչը մեծ հարված է Հայաստանի` առանց այն էլ ծանր վիճակում գտնվող ժողովրդագրական իրադրությանը»:
«Սա աբորտի հարցը չի, այլ կոնկրետ աղջիկ երեխաների նկատմամբ ունեցաց կարծրատիպերի ու հայրիշխանական համակարգի ստեղծած աղետն է,-վստահ է Մամիկոն Հովսեփյանը,- հասարակությունը դեռևս սեռով պայմանավորված հղիության ընդհատման վտանգը չի գիտակցում»:
Ուսումնասիրությունների համաձայն, եթե Հայաստանում շարունակվեն ապագա երեխայի սեռը կանխորոշող կամ, այսպես կոչված, սելեկտիվ, աբորտները, ապա մինչև 2060 թվականը 93 000 մայր չի ծնվի:
Ակցիայի լուսանկարներն` այստեղ:
© Medialab.am
